حیدر علی آتش

پہروں ہی مصرع سودا ہے رلاتا آتشؔ
تجھے اے دیدۂِ گریاں نہ ہوا تھا سو ہوا
دل اس قدر گداز ہے برسوں ہی غم رہے
آنسو جو اپنے دیدۂِ گریاں سے دور ہوں

مصحفی غلام ہمدانی

ہر دم آتے ہیں بھرے دیدۂِ گریاں تجھ بن
مجھ کو یہ ڈر ہے کہ لائیں نہ یہ طوفاں تجھ بن

مصطفٰیٰ خان شیفتہ

گرم گرم اس رخِ نازک پہ نظر کی کس نے
رشکِ گل ریز ہے کیوں دیدۂِ گریاں میرا
پانی پانی ہوئے مرقد پہ مرے آ کے وہ جب
شمع کو نعش پہ پروانے کی، گریاں دیکھا

عرفان صدیقی

آ جا کبھی ہم گوشہ نشیناں کے لیے بھی
شانہ ہو کوئی دیدۂ گریاں کے لیے بھی

مجید امجد

ماجرائے شوق کی بے باکیاں ان پر نثار
ہائے وہ آنکھیں جو ضبطِ غم میں گریاں ہو گئیں

اسرار الحق مجاز

کچھ تجھ کو خبر ہے ہم کیا کیا اے شورش دوراں بھول گئے
وہ زلفِ پریشاں بھول گئے وہ دیدۂ گریاں بھول گئے

ضیا جالندھری

کیسی دوری اسی شعلے کی ہے ضو میرا جمال
جس سے تابندہ رہا دیدۂ گریاں اپنا
یہ وہ آنسو ہیں جو اندر کی طرف گرتے ہیں
ہوں بھی تو ہم نظر آتے نہیں گریاں بابا

حفیظ جالندھری

دور رفتہ دیکھ لیتا ہوں گلستاں دیکھ کر
گل کو خنداں دیکھ کر بلبل کو گریاں دیکھ کر

شکیل بدایونی

آ ہی گئے وہ عرض ندامت کو اے شکیلؔ
لعلیں لبوں پہ خندۂ گریاں لیے ہوئے

امیر مینائی

آگ دل میں جو لگی تھی، وہ بجھائی نہ گئی
اور کیا تجھ سے ، پھر اے دیدۂ گریاں ہو گا