انشاء اللہ خان انشا

کسی کے ہوش کو کہہ دو اگر چلا چاہے
تو اپنے گھر سے کمر باندھ کر ابھی نکلے

داغ دہلوی

ٹھہر ٹھہر کے جلا دل کو ایک بار نہ پھونک
کہ اس میں بوئے محبت ابھی نکلتی ہے
مرے نکالے نہ نکلے گی آرزو میری
جو تم نکالنا چاہو ابھی نکلتی ہے

شیخ ابراہیم ذوق

ہو عمرِ خضر بھی تو ہو معلوم وقت مرگ
ہم کیا رہے یہاں ابھی آئے ابھی چلے

مومن خان مومن

کیا گل کھلے گا دیکھیے ہے فصلِ گل تو دور
اور سوئے دشت بھاگتے ہیں کچھ ابھی سے ہم

جون ایلیا

ابھی ہونے کی باتیں ہیں سو کر لو
ابھی تو کچھ نہیں ہونا ابھی کیا
بانہوں سے میری وہ ابھی رخصت نہیں ہوا
پر گم ہوں انتظار میں اس کے ابھی سے میں

مصطفی زیدی

آگے آگے جنون بھی ہو گا!
شعر میں لو ابھی سے ملتی ہے

بہزاد لکھنوی

کچھ دیر اور رہنے دے خودداری جنوں
دامن تو چاک ہونا ہے لیکن ابھی نہیں

جلیل مانک پوری

سوچتا کیا ہے پی بھی لے زاہد
کچھ قیامت ابھی نہیں آتی

حفیظ جالندھری

آج بھی پایا ہے ان کو بد مزاج
صورت حالات ابھی اچھی نہیں

احمد فراز

عشق آغاز ہی سے مشکل ہے
صبر کرنا ابھی سے مشکل ہے

فراق گورکھپوری

میعاد دوام و ابد اک نیند ہے اس کی
ہم منتہی جلوۂ جاناں ہیں ابھی سے
بدلتے جا رہے ہیں ہم بھی دنیا کو بدلنے میں
نہیں بدلی ابھی دنیا تو دنیا کو ابھی بدلا

ناصر کاظمی

منہ اندھیرے ہی ناصر کسے ڈھونڈنے چل دیے
دور ہے صبحِ روشن ابھی سو رہو سو رہو
ایسی جلدی بھی کیا، چلے جانا
مجھے اک بات پوچھنی ہے ابھی

نوح ناروی

وہ مجھ سے یہ کہتے ہیں کہ محشر کو ملوں گا
میں ان سے یہ کہتا ہوں کہ جو کچھ ہو ابھی ہو