انشاء اللہ خان انشا

چارہ ساز اپنے تو مصروف بدل ہیں لیکن
کوئی تقدیر کے لکھے کو مٹا سکتے ہیں

حیدر علی آتش

ابروئے کج سے خونِ عشاق کیا عجب ہے
تلوار نے نشان لشکر مٹا دیے ہیں
ہستی کو مثل نقشِ کفِ پا مٹا چکے
عاشق نقاب شاہد مقصود اٹھا چکے

فیض احمد فیض

ادھر ایک حرف کہ کشتنی، یہاں لاکھ عذر تھا گفتنی
جو کہا تو سن کے اڑا دیا، جو لکھا تو پڑھ کے مٹا دیا

جون ایلیا

جو نہیں ہے مرے دل کی دنیا
کیوں نہ میں جونؔ مٹا دوں اس کو

جگر مراد آبادی

رہ خلوص محبت کے حادثات جہاں
مجھے تو کیا مرے نقشِ قدم مٹا نہ سکے

احسان دانش

ہم حقیقت ہیں تو تسلیم نہ کرنے کا سبب
ہاں اگر حرفِ غلط ہیں تو مٹا دو ہم کو

بشیر بدر

ذرا دیکھ چاند کی پتیوں نے بکھر بکھر کے تمام شب
ترا نام لکھا ہے ریت پر کوئی لہر آ کے مٹا نہ دے

سدرشن فاکر

سزا دیں صلہ دیں بنا دیں مٹا دیں
مگر وہ کوئی فیصلہ تو سنا دیں

عبید اللہ علیم

سچ ہوں تو مجھے امر بنا دے
جھوٹا ہوں تو نقش سب مٹا دے

احمد راہی

وقت کے ساتھ گزر جاتا ہے ہر اک صدمہ
وقت ہر زخم کو ہر غم کو مٹا دیتا ہے

حفیظ جالندھری

میری قسمت کے نوشتے کو مٹا دے کوئی
مجھ کو قسمت کے نوشتے نے مٹا رکھا ہے
نقشِ وفا تو میں ہی تھا اب مجھے ڈھونڈتے ہو کیا
حرفِ غلط نظر پڑا تم نے مجھے مٹا دیا

سیماب اکبر آبادی

جہاں خرابۂ ہستی مٹا رہا ہے کوئی
وہیں کہیں نئی دنیا بنا رہا ہے کوئی
جو ذہن میں ہے وہ تصویر بن نہیں چکتی
بنا بنا کے ہیولے مٹا رہا ہے کوئی

فانی بدایونی

اب مری لاش پر حضور موت کو کوستے تو ہیں
آپ کو یہ بھی ہوش ہے کس نے کسے مٹا دیا
جب دل میں ترے غم نے حسرت کی بنا ڈالی
دنیا مری راحت کی قسمت نے مٹا ڈالی
اس دور میں یہ طرز جفا آزما کے دیکھ
دل کے بجائے دل کے سکوں کو مٹا کے دیکھ

امیر مینائی

اس کی حسرت ہے ، جسے دل سے مٹا بھی نہ سکوں
ڈھونڈ نے اس کو چلا ہوں جسے پا ہی نہ سکوں

ناصر کاظمی

جو گفتنی نہیں وہ بات بھی سنا دوں گا
تو ایک بار تو مل، سب گلے مٹا دوں گا