انشاء اللہ خان انشا

ہے محبت جو ترے دل میں وہ اک طور پہ ہے
ہم گھٹا سکتے ہیں اس کو نہ بڑھا سکتے ہیں

حیدر علی آتش

گستاخ ہاتھ طوق کمر یار کے ہوئے
حد ادب سے پاؤں کو آگے بڑھا چکے

شیخ ابراہیم ذوق

اس کے قدموں تک نہ بیتابی بڑھا کر لے گئی
ہائے دو پلٹے دیے اور پھر ہٹا کر لے گئی

مرزا رفیع سودا

ضعف و نا طاقتی و سستی و اعضا شکنی
ایک گھنٹے میں جوانی کے بڑھا کیا کیا کچھ

باقی صدیقی

رنگ ہر بات میں بھرنے والو
قصہ کچھ آگے بڑھا ہے کہ نہیں
بعض اوقات ہوا کے جھونکے
لو چراغوں کی بڑھا دیتے ہیں
رسم سجدہ بھی اٹھا دی ہم نے
عظمت عشق بڑھا دی ہم نے

جگر مراد آبادی

اپنے فروغِ حسن کی دکھلا کے وسعتیں
میرے حدود شوق بڑھا کر چلے گئے
اب کاروبار عشق سے فرصت مجھے کہاں
کونین کا وہ درد بڑھا کر چلے گئے

عبدالحمید عدم

مجھے گلہ تو نہیں آپ کے تغافل سے
مگر حضور نے ہمت بڑھا کے مار دیا

قمر جلالوی

مجھ تشنہ لب کی ساقی تشنہ لبی بڑھا دی
دے کر ذرا سا پانی اک آگ سی لگا دی
نزع کی اور بھی تکلیف بڑھا دی تو نے
کچھ نہ بن آیا تو آواز سنا دی تو نے

جمال احسانی

پہلے ہی بہت تھا ہجر کا رنج
اب فاصلوں نے بڑھا دیا ہے

رئیس فروغؔ

ہم بھی لے کو تیز کریں گے بوندوں کی بوچھار کے ساتھ
پہلا ساون جھولنے والو تم بھی پینگ بڑھا دینا

ادا جعفری

جمال شب مرے خوابوں کی روشنی تک ہے
خدا نہ کردہ چراغوں کی لو بڑھا نہ ملے

بشیر بدر

وقت کو ماہ و سال کی زنجیروں میں جکڑ کر کیا پایا ہے
وقت تو ماہ و سال کی زنجیروں میں اور بھی تیز بڑھا ہے
ایک پل بھی کبھی ہو جاتا ہے صدیوں جیسا
دیر کیا کرنا یہاں ہاتھ بڑھا جام اٹھا

سدرشن فاکر

میرے رکتے ہی مری سانسیں بھی رک جائیں گی
فاصلے اور بڑھا دو کہ میں زندہ ہوں ابھی

عبید اللہ علیم

یا میرے دیے کی لو بڑھا دے
یا رات کو صبح سے ملا دے

فارغ بخاری

مسیح وقت سہی ہم کو اس سے کیا لینا
کبھی ملے بھی تو کچھ دردِ دل بڑھا لینا

حسرت موہانی

اس کا انجام بھی کچھ سوچ لیا ہے حسرتؔ
تو نے ربط ان سے جو اس درجہ بڑھا رکھا ہے

حفیظ جالندھری

کوئی دوا نہ دے سکے مشورۂ دعا دیا
چارہ گروں نے اور بھی دردِ دل کا بڑھا دیا

سیماب اکبر آبادی

روز اک دردِ تمنا سے نیا لیتے ہیں
ہم یونہی زندگی عشق بڑھا لیتے ہیں
وفا کی داد ہے کوتاہی وفا کی دلیل
میں جانتا ہوں کہ ہمت بڑھا رہا ہے کوئی

شکیل بدایونی

مجھے چھوڑ دے مرے حال پر ترا کیا بھروسا ہے چارہ گر
یہ تری نوازش مختصر مرا درد اور بڑھا نہ دے
وہ اٹھے ہیں لے کے خم و سبو ارے او شکیلؔ کہاں ہے تو
ترا جام لینے کو بزم میں کوئی اور ہاتھ بڑھا نہ دے
کمال حوصلۂ دل دکھا رہا ہوں میں
کسی سے رسمِ محبت بڑھا رہا ہوں میں

فانی بدایونی

اس شورش حیات کو حد سے بڑھا کے دیکھ
یہ فتنہ اور حشر سے پہلے اٹھا کے دیکھ

احمد فراز

اک یہ بھی تو انداز علاج غمِ جاں ہے
اے چارہ گرو درد بڑھا کیوں نہیں دیتے
جدائیاں ہوں تو ایسی کہ عمر بھر نہ ملیں
فریب دو تو ذرا سلسلے بڑھا کے مجھے

امیر مینائی

دھیان میں لا کے ترا سلسلۂ زلفِ دراز
ہم شبِ ہجر کو کچھ اور بڑھا لیتے ہیں؟

قابل اجمیری

حادثے زیست کی توقیر بڑھا دیتے ہیں
اے غمِ یار تجھے ہم تو دعا دیتے ہیں

قتیل شفائی

اسے منا کر غرور اس کا بڑھا نہ دینا
وہ سامنے آئے بھی تو اس کو صدا نہ دینا

کلیم عاجز

مجھے اس کا کوئی گلہ نہیں کہ بہار نے مجھے کیا دیا
تری آرزو تو نکال دی ترا حوصلہ تو بڑھا دیا

کیف بھوپالی

آپ نے جھوٹا وعدہ کر کے
آج ہماری عمر بڑھا دی