انشاء اللہ خان انشا

پھر کچھ گئے ہوؤں کی مطلق خبر نہ پائے
کیا جانیے کدھر کو جاتا یہ قافلہ ہے

حیدر علی آتش

توڑ کر تارِ نگہ کا سلسلہ جاتا رہا
خاک ڈال آنکھوں میں میری قافلہ جاتا رہا
جب اٹھایا پاؤں آتشؔ مثل آوازِ جرس
کوسوں پیچھے چھوڑ کر میں قافلہ جاتا رہا

باقی صدیقی

منزلِ دل کی جستجو معلوم
دور اک قافلہ تھا پہلے بھی

عرفان صدیقی

رکا ہوا ہے یہ صحرا میں قافلہ کیسا
اور ایک شور سا خیموں میں ہے بپا کیسا
تم نکل کر کس کا استقبال کرنے آئے ہو
شہر والو، دشت میں وہ قافلہ مارا گیا

جلیل مانک پوری

رو رہے تھے دل کو ہم یاں ہوش بھی جاتے رہے
گم شدہ یوسف کے پیچھے قافلہ جاتا رہا

احمد فراز

ہم سفر چاہیے ہجوم نہیں
اک مسافر بھی قافلہ ہے مجھے

امیر مینائی

تمہارے غمزوں نے کھوئے ہیں ہوش و صبر و قرار
انہیں لٹیروں نے لوٹا ہے قافلہ دل کا
امیر بھول بھلیاں ہے کوچۂ گیسو
تباہ کیوں نہ پھرے اس میں قافلہ دل کا

کیفی اعظمی

خار و خس تو اٹھیں راستہ تو چلے
میں اگر تھک گیا قافلہ تو چلے