بہادر شاہ ظفر

دلِ صد چاک بنایا تو بلا سے لیکن
زلفِ مشکیں کا ترے شانہ بنایا ہوتا

حیدر علی آتش

حنائی ہاتھوں سے چوٹی کو کھولتا ہے یار
کہاں سے پنجۂِ مرجاں حریف شانہ ہوا
کیا کیا الجھتا ہے تری زلفوں کے تار سے
بخیہ طلب ہے سینۂِ صد چاک شانہ کیا
وہ نازنیں یہ نزاکت میں کچھ یگانہ ہوا
جو پہنی پھولوں کی بدھی تو درد شانہ ہوا
خیال آیا ہے آئینہ کا منہ اس میں وہ دیکھیں گے
اب الجھے بال سکھانے کی خاطر شانہ آتا ہے
جو چشم کہ حیراں ہوئی آئینہ ہے اس کی
جو سینہ کہ صد چاک ہوا شانہ ہے اس کا

شیخ ابراہیم ذوق

کس نزاکت سے ہے دیکھو اتحاد حسن و عشق
زلف واں شانے نے کھینچی درد ہے یاں شانہ میں

یگانہ چنگیزی

یار ہے آئنہ ہے شانہ ہے
چشمِ بد دور کیا زمانہ ہے

قمر جلالوی

اگر چھوٹا بھی اس سے آئینہ خانہ تو کیا ہو گا
وہ الجھے ہی رہیں گے زلف میں شانہ تو کیا ہو گا

شاد عظیم آبادی

کس زلف کو سلجھائیں رقیبان سیہ کار
چھوتا نہیں اس زلف کو پھر شانہ ہمارا

کلیم عاجز

ہم تو خیر آشفتہ ساماں ہیں ہمارا کیا سوال
وہ تو سنوریں جن کو آئینہ ملا شانہ ملا
مرے ہی دونوں ہاتھ آتے ہیں کام ان کے سنورنے میں
دکھاتا ہے کوئی آئینہ کوئی شانہ بنتا ہے
نظر کو آئنہ دل کو ترا شانہ بنا دیں گے
تجھے ہم کیا سے کیا اے زلف جانانہ بنا دیں گے