حیدر علی آتش

مگر اس کو فریب نرگس مستانہ آتا ہے
الٹتی ہیں صفیں گردش میں جب پیمانہ آتا ہے
حسن پری اک جلوۂِ مستانہ ہے اس کا
ہشیار وہی ہے کہ جو دیوانہ ہے اس کا

داغ دہلوی

مجھے اے اہل کعبہ یاد کیا مے خانہ آتا ہے
ادھر دیوانہ جاتا ہے ادھر مستانہ آتا ہے
جگر تک آتے آتے سو جگہ گرتا ہوا آیا
ترا تیرِ نظر آتا ہے یا مستانہ آتا ہے

سراج الدین ظفر

یہ حسرت ہے جوانی باریاب حسن ہو جائے
ہے آوارہ یہ موج نکہت مستانہ برسوں سے

عبدالحمید عدم

موجِ ہوا سے زلف جو لہرا گئی تری
میرا شعور لغزشِ مستانہ بن گیا

عرفان صدیقی

جو رنج میں اس دل پہ اٹھایا ہوں اسے چھوڑ
تو صرف مرا نعرۂ مستانہ اٹھا لے

مجید امجد

روشن ترائیوں سے اترتی ہوا میں آج
دو چار گام لغزشِ مستانہ چاہیے

احسان دانش

پھر وہی صوت طرب افزا بنے فردوسِ گوش
جس سے اک عالم شہید نغمۂ مستانہ تھا

اختر شیرانی

گھٹائیں بھی تو بہکی جا رہی ہیں ان اداؤں پر
چمن میں جو قدم رکھتے ہیں وہ مستانہ رکھتے ہیں
ان کا پیغام نہ لائے ہوں یہ رنگیں بادل
ورنہ کیوں ساتھ مرے بے خود و مستانہ چلے

علی سردار جعفری

لغزش گام لیے لغزشِ مستانہ لیے
آئے ہم بزم میں پھر جرأتِ رندانہ لیے

جوش ملیح آبادی

خشک ذروں پہ مچل جائے شمیم و تسنیم
ثبت کرتے ہوئے یوں لغزش مستانہ چلیں

حفیظ جالندھری

یہ تنہائی کا عالم چاند تاروں کی یہ خاموشی
حفیظؔ اب لطف ہے اک نعرۂ مستانہ ہو جائے
مل جائے مے تو سجدۂ شکرانہ چاہیے
پیتے ہی ایک لغزشِ مستانہ چاہیے

امیر مینائی

ہم تھے اور پیشِ نظر جلوۂ مستانۂ عشق
جس زمانے میں نہ محرم تھا نہ بیگانہ عشق
آ رہے باغ جناں سے جو زمیں پر آدم
فی الحقیقت تھی وہ اک لغزشِ مستانۂ عشق

کیفی اعظمی

لائی پھر اک لغزشِ مستانہ تیرے شہر میں
پھر بنیں گی مسجدیں مے خانہ تیرے شہر میں