حیدر علی آتش

نہیں ہے مثل صدف مجھ سا دوسرا کمبخت
نصیب غیر مرے منہ کا آب و دانہ ہوا
صیاد اسیرِ دام رگِ گل ہے عندلیب
دکھلا رہا ہے چھپ کے اسے دام و دانہ کیا
صید گاہ مرغِ دل رخسارۂِ جانانہ ہے
دام زلف عنبریں ہے خال مشکیں دانہ ہے
پھوٹیں وہ آنکھیں نگاہِ بد سے جو دیکھیں تجھے
آتشیں رخسار مجمر خال کالا دانہ ہے
نہایت دل کو ہے مرغوب بوسہ خال مشکیں کا
دہن تک اپنے کب تک دیکھیے یہ دانہ آتا ہے
پھنسا دیتا ہے مرغِ دل کو دام زلف پیچاں میں
تمہارے خال رخ کو بھی فریب دانہ آتا ہے

داغ دہلوی

مری مژگاں سے آنسو پوچھتا ہے کس لیے ناصح
ٹپک پڑتا ہے خود جو اس شجر میں دانہ آتا ہے

شیخ ابراہیم ذوق

برقِ خرمن سوز دانائی ہے نافہمی تری
ورنہ کیا کیا لہلہاتے کھیت ہیں ہر دانہ میں

عرفان صدیقی

ہم لفظ سے مضمون اٹھا لاتے ہیں جیسے
مٹی سے کوئی گوہرِ یک دانہ اٹھا لے

جلیل مانک پوری

یہ جانیے کہ لگی ہاتھ دولتِ کونین
ملے جو خرمن ہستی سے ایک دانۂ عشق

احمد فراز

اے خدا دردِ دل ہے بخشش دوست
آب و دانہ نہیں کہ تجھ سے کہیں

امیر مینائی

کچھ گرہ میں نہیں گرمی کے سوا مثلِ سپند
برگ و بر دود و شرر ہوں جو اگے دانۂ عشق
دل نے تسبیح بنا کر وہ کیے زیبِ گلو
ہاتھ آئے جو کوئی گوہرِ یک دانۂ عشق
خاکِ درکار ہے وہ لوثِ خطا سے جو ہو پاک
ورنہ ہر خاک سے اگتا ہے کوئی دانۂ عشق
طالبِ درد ہے اس درجہ مرا طائرِ دل
ٹوٹ پڑتا ہے یہ جس دام میں ہو دانۂ عشق
مر کے دے روح کو میری یہ الٰہی قدرت
ہنس بن بن کے چگے گوہرِ یک دانۂ عشق

محسن احسان

مرے خدا نے طلب سے مجھے زیادہ دیا
مرا نصیب نہ محروم آب و دانہ ہوا