حیدر علی آتش

آفتیں ڈھاتی ہے وہ نرگس فتاں کیا کیا
داغ دیتی ہے مجھے گردشِ دوراں کیا کیا
گردشِ چشم دکھاتا ہے کبھی گردش جام
میری تدبیر میں پھرتا ہے یہ دوراں کیا کیا
گردش سے چشمِ یار کے آتشؔ عجب نہیں
جو جو عمل کہ گردشِ دوراں سے دور ہوں

فیض احمد فیض

کچھ بھی ہو آئینۂ دل کو مصفا رکھیے
جو بھی گزرے ، مثل خسروِ دوراں چلیے

عبدالحمید عدم

اے ساقی مہ وش غمِ دوراں نہیں اٹھتا
درویش کے حجرے سے یہ مہماں نہیں اٹھتا

قمر جلالوی

واعظ مٹے گا تجھ سے غمِ روزگار کیا
ساغر چلے گا گردشِ دوراں کے ساتھ ساتھ

مصطفی زیدی

کف مومن سے نہ دروازۂ دوراں سے ملا
رشتۂ درد اسی دشمن ایماں سے ملا

اختر شیرانی

غم عزیزوں کا حسینوں کی جدائی دیکھی
دیکھیں دکھلائے ابھی گردشِ دوراں کیا کیا
ہم سا نہ ملے گا کوئی غمِ دوست جہاں میں
تڑپا لے غم گردشِ دوراں کوئی دن اور

اسرار الحق مجاز

کچھ تجھ کو خبر ہے ہم کیا کیا اے شورش دوراں بھول گئے
وہ زلفِ پریشاں بھول گئے وہ دیدۂ گریاں بھول گئے

زہرا نگاہ

ترا خیال فروزاں ہے دیکھیے کیا ہو
خموش گردشِ دوراں ہے دیکھیے کیا ہو

ظہیر کاشمیری

تو مری ذات مری روح مرا حسنِ کلام
دیکھ اب تو نہ بدل گردشِ دوراں کی طرح
ہم راہ لطف چشم گریزاں بھی آئے گی
وہ آئیں گے تو گردشِ دوراں بھی آئے گی

حفیظ ہوشیارپوری

تو جہاں جائے گی غارت گر ہستی بن کر
ہم بھی اب ساتھ ترے گردشِ دوراں ہوں گے

شکیل بدایونی

ہر چند اہلِ ہوش تھے ارباب زندگی
لیکن فریب گردشِ دوراں میں آ گئے

فراق گورکھپوری

کچھ اپنا آشنا کیوں اے دلِ ناداں نہیں ہوتا
کہ آئے یہ رنگ گردشِ دوراں نہیں ہوتا

قابل اجمیری

ہم بے کسوں کی بزم میں آئے گا اور کون
آ بیٹھتی ہے گردشِ دوراں کبھی کبھی

مجروح سلطان پوری

آخر غمِ جاناں کو اے دل بڑھ کر غمِ دوراں ہونا تھا
اس قطرے کو بننا تھا دریا اس موج کو طوفاں ہونا تھا

ناصر کاظمی

دن بھی اداس اور مری رات بھی اداس
ایسا تو وقت اے غمِ دوراں نہ تھا کبھی