حیدر علی آتش

شہیدِ ناز و ادا کا ترے زمانہ ہوا
اڑایا مہندی نے دل چور کا بہانہ ہوا
ہوا جو دن تو ہوا اس کو پاسِ رسوائی
جو رات آئی تو پھر نیند کا بہانہ ہوا
آتی ہے کس طرح سے مرے قبض روح کو
دیکھوں تو موت ڈھونڈ رہی ہے بہانہ کیا

مصطفٰی خان شیفتہ

معلوم ہے ستاتے ہو ہر اک بہانے سے
قصداً نہ آئے رات، حنا کا بہانہ تھا

یگانہ چنگیزی

یاسؔ اب آپ میں نہ آئیں گے
وصل اک موت کا بہانہ ہے

جون ایلیا

ہم جی رہے ہیں کوئی بہانہ کیے بغیر
اس کے بغیر اس کی تمنا کیے بغیر

جگر مراد آبادی

مری زندگی تو گزری ترے ہجر کے سہارے
مری موت کو بھی پیارے کوئی چاہیے بہانہ

قمر جلالوی

مرے روٹھ جانے والے تجھے یوں منا رہا ہوں
کہ قضا کے واسطے بھی کوئی چاہیے بہانہ

عرفان صدیقی

جا کے ہم دیکھ چکے ، بند ہے دروازہ شہر
ایک رات اور یہ رکنے کا بہانہ اچھا
تمام تاب و تبِ عاشقی بہانہ ترا
بدن کسی کا بھی ہو وصل جاؤدانہ ترا
ہمیں تو خیر بکھرنا ہی تھا کبھی نہ کبھی
ہوائے تازہ کا جھونکا بہانہ ہو گیا ہے

مجید امجد

کیا کہیے کیا حجابِ حیا کا فسانہ تھا!
سب کچھ بس اک نگاہِ کرم کا بہانہ تھا

بیخود بدایونی

پیام لے کے جو پیغام بر روانہ ہوا
حسد کو حیلہ ملا اشک کو بہانہ ہوا

غلام محمد قاصر

دیوار پہ وعدوں کی امر بیل چڑھا دی
رخصت کے لیے اور بہانہ ہی نہیں تھا

فانی بدایونی

جلوۂ عشق حقیقت تھی حسنِ مجاز بہانہ تھا
شمع جسے ہم سمجھے تھے شمع نہ تھی پروانہ تھا

احمد فراز

کہتا تھا ناصحوں سے مرے منہ نہ آئیو
پھر کیا تھا ایک ہو کا بہانہ بہت ہوا
اتنی شدت سے نہ مل تو کہ جدائی چاہیں
یہی قربت تری دوری کا بہانہ بن جائے

محسن احسان

کشیدگی مراسم سے مطمئن ہوں بہت
فسردہ خاطری یار تو بہانہ ہوا