حیدر علی آتش

آتشؔ غلام ساقی کوثر ہوں چاہیے
فردوس کا کھلا ہوا دروازہ پاؤں میں

باقی صدیقی

نظر نظر سے نکلتی ہیں درد کی ٹیسیں
قدم قدم پہ وہ کینٹے چبھے ہیں پاؤں میں

الطاف حسین حالی

شہسواروں پہ بند ہے جو راہ
وقف ہے یاں برہنہ پاؤں پر

جمال احسانی

اس رستے پر پیچھے سے اتنی آوازیں آئیں جمالؔ
ایک جگہ تو گھوم کے رہ گئی ایڑی سیدھے پاؤں کی

رئیس فروغؔ

دھوپ میں ہم ہیں کبھی ہم چھاؤں میں
راستے الجھے ہوئے ہیں پاؤں میں

فارغ بخاری

دو گھڑی بیٹھے تھے زلف عنبریں کی چھاؤں میں
چبھ گیا کانٹا دلِ حسرت زدہ کے پاؤں میں
کیا کہوں طول شبِ غم پل میں صدیاں ڈھل گئیں
وقت یوں گزرا کہ جیسے آبلے ہوں پاؤں میں
صحرا کا خار خار ہے محروم تشنگی
کتنا ستم ظریف وہ چھالا تھا پاؤں کا

ماجد صدیقی

جو گریباں کبھی تھا زیبِ گلو
اب وہ زیور بنا ہے پاؤں کا
نظر کی شاخ پہ اس طرح اب سجاؤں تجھے
کہ ایک آن بھی خود سے جدا نہ پاؤں تجھے

خاطر غزنوی

یوں تو رواں ہیں میرے تعاقب میں منزلیں
لیکن میں ٹھوکروں کو لپیٹے ہوں پاؤں میں

احمد فراز

میں کہ پر شور سمندر تھے مرے پاؤں میں
اب کہ ڈوبا ہوں تو سوکھے ہوئے دریاؤں میں

قتیل شفائی

رقص کرنے کا ملا حکم جو دریاؤں میں
ہم نے خوش ہو کے بھنور باندھ لیے پاؤں میں
داد سفر ملی ہے کسے راہِ شوق میں
ہم نے مٹا دیے ہیں نشاں اپنے پاؤں کے