حیدر علی آتش

حیواں پر آدمی کو شرف نطق سے ہوا
شکرِ خدا کرے جو زبان بشر کھلے

داغ دہلوی

کوئی آسان ہے تیرا دیدار
پہلے بنوائے تو بشر آنکھیں
کیوں کفر ہے دیدار صنم حضرتِ واعظ
اللہ دکھاتا ہے بشر دیکھ رہے ہیں

شیخ ابراہیم ذوق

گہر کو جوہری صراف زر کو دیکھتے ہیں
بشر کے ہیں جو مبصر بشر کو دیکھتے ہیں
نہ خوب و زشت نہ عیب و ہنر کو دیکھتے ہیں
یہ چیز کیا ہے بشر ہم بشر کو دیکھتے ہیں

میر مہدی مجروح

سوائے شر نہ کچھ دیکھا عدو سے
خدا محفوظ رکھے اس بشر سے

باقی صدیقی

قانون خدا بھی ہم نے دیکھا
ترمیم بشر بھی دیکھ لیں گے

الطاف حسین حالی

دیکھیے شیخ مصور سے کھچے یا نہ کھچے
صورت اور آپ سے بے عیب بشر کی صورت

جمال احسانی

بیچ کا رستہ نہیں باقی کوئی
یا خدا ہے یا بشر موجود ہے

بیخود بدایونی

بیخودؔ محو و شکوہ ہائے عتاب
اس منش کا تو وہ بشر ہی نہیں

سدرشن فاکر

آج انساں سے ہے انساں برسرِ پیکار یوں
الاماں شیطاں پڑھے خوئے بشر کو دیکھ کر

ظہیر کاشمیری

آدمی ٹکڑوں کی صورت میں ہوا ہے منتشر
وحدت فکر و نظر والے بشر ملتے نہیں

علی سردار جعفری

یہ عالم خاکی اک سیارۂ روشن ہے
افلاک سے ٹکرا دو تقدیر بشر لے کر

فارغ بخاری

آج کے دور کا دعویٰ ہے کہ عنقا کے سوا
کوئی عقدہ نہیں عرفان بشر سے آگے

تلوک چند محروم

تقدیر میں ہے اس کی فشار لحد وہی
تدبیر سے اڑا بھی تو پہنچا بشر کہاں

جلیل مانک پوری

عاشقی کیا ہر بشر کا کام ہے
میرے دل میرے جگر کا کام ہے
قدسیوں سے کون بازی لے گیا
یہ بشر ہے یہ بشر کا کام ہے

سید ضمیر جعفری

یوں قتلِ عام نوعِ بشر کر دیا گیا
راسخ طبیعتوں ہی میں ڈر کر دیا گیا

شکیل بدایونی

اس درجہ بد گماں ہیں خلوص بشر سے ہم
اپنوں کو دیکھتے ہیں پرائی نظر سے ہم

فراق گورکھپوری

وہ تمام شکر و رضا سہی وہ تمام صبر و سکوں سہی
تو ہے جس سے مائل امتحاں وہ فرشتہ ہے تو بشر بھی ہے

کلیم عاجز

عقل و خرد کے ہنگاموں میں شوق کا دامن چھوٹ نہ جائے
شوق بشر کو لے جاتا ہے عقل بشر سے آگے بھی

محسن نقوی

چلے جو ذکر فرشتوں کی پارسائی کا
تو زیرِ بحث مقام بشر بھی آتا ہے

نوح ناروی

ان سے جو نہ اٹھا تھا اسے اس نے اٹھایا
قائل ہیں ملائک کہ بشر بھی ہے کوئی چیز