مرزا غالب

آئینہ دیکھ، اپنا سا منہ لے کے رہ گئے
صاحب کو دل نہ دینے پہ کتنا غرور تھا

مصحفی غلام ہمدانی

کیا کھینچے ہے خود کو دور اللہ
اللٰہ رے ترا غرور اللہ

یگانہ چنگیزی

جب حسنِ بے مثال پر اتنا غرور تھا
آئینہ دیکھنا تمہیں پھر کیا ضرور تھا
کیوں بیٹھے ہاتھ ملتے ہو اب یاسؔ کیا ہوا
اس بے وفا شباب پر اتنا غرور تھا

باقی صدیقی

اپنی اپنی وفاؤں پر سب کو
تھوڑا تھوڑا غرور ہوتا ہے
صورت آئینہ شکست ہوا
عشق بھی جب غرور تک پہنچا

جگر مراد آبادی

آنکھوں کا تھا قصور نہ دل کا قصور تھا
آیا جو میرے سامنے میرا غرور تھا

عرفان صدیقی

ہم نے اسے محبوب کیا یہ سوچ کے جی میں غرور کرے
دل سے ہمیں فرزانہ جانے دیوانہ مشہور کرے

بشیر بدر

غرور اس پہ بہت سجتا ہے مگر کہہ دو
اسی میں اس کا بھلا ہے غرور کم کر دے

بیخود بدایونی

کبھی حیا انہیں آئی کبھی غرور آیا
ہمارے کام میں سو سو طرح فتور آیا

شکیل بدایونی

رکھی ہوئی ہے سنگِ در یار پر جبیں
اس عجز پر غرور کیے جا رہا ہوں میں

عزیز حامد مدنی

عشق بھی مہر بہ لب گزرا ہے دنیا کی کیا جرأت تھی
اس کی نیچی نظروں میں بھی ایسا سخت غرور رہا

فانی بدایونی

تھی ان کے روبرو بھی وہی شان اضطراب
دل کو بھی اپنی وضع پہ کتنا غرور تھا

شاذ تمکنت

نہ تو مرا نہ تری ہم نشینیاں میری
بھرم ہے جس کو سمجھتے ہیں سب غرور اب تک

قتیل شفائی

اس ادا سے بھی ہوں میں آشنا تجھے اتنا جس پہ غرور ہے
میں جیوں گا تیرے بغیر بھی مجھے زندگی کا شعور ہے

نوح ناروی

جناب نوحؔ زمانے کا اعتبار نہیں
برا کیا جو کسی سے غرور میں نے کیا