داغ دہلوی

اب وہ یہ کہہ رہے ہیں مری مان جائیے
اللہ تیری شان کے قربان جائیے
بگڑے ہوئے مزاج کو پہچان جائیے
سیدھی طرح نہ مانئے گا مان جائیے
دو مشکلیں ہیں ایک جتانے میں شوق کے
پہلے تو جان جائیے پھر مان جائیے
دونوں سے امتحان وفا پر یہ کہہ دیا
منوائیے رقیب کو یا مان جائیے
کیا فرض ہے کہ سب مری باتیں قبول ہیں
سن سن کے کچھ نہ مانئے کچھ مان جائیے
یہ مختصر جواب ملا عرض وصل پر
دل مانتا نہیں کہ تری مان جائیے
وہ آزمودہ کار تو ہے گر ولی نہیں
جو کچھ بتائے داغؔ اسے مان جائیے
خاطر سے یا لحاظ سے میں مان تو گیا
جھوٹی قسم سے آپ کا ایمان تو گیا
ضد ہر اک بات پر نہیں اچھی
دوست کی دوست مان لیتے ہیں
داغؔ بھی ہے عجیب سحرِ بیاں
بات جس کی وہ مان لیتے ہیں

مصحفی غلام ہمدانی

ترسوں ہوں تری یک نگہِ لطف کو پیارے
اتنا بھی تو مجھ کو نہ کڑا مان ادھر دیکھ

عرفان صدیقی

کاش میں بھی کبھی یاروں کا کہا مان سکوں
آنکھ کے جسم پہ خوابوں کی ردا تان سکوں

جمال احسانی

جو اصل بات ہے اس کو چھپانے کی خاطر
کبھی کبھی غلطی مان جایا کرتے ہیں
جمالؔ ہم تو تجھے یہ بھی اب نہیں کہتے
کبھی کسی کا کہا مان جایا کرتے ہیں

زہرا نگاہ

خوب ہے صاحب محفل کی ادا
کوئی بولا تو برا مان گئے
تیری ایک ایک ادا پہچانی
اپنی ایک ایک خطا مان گئے

سیف الدین سیف

در پردہ جفاؤں کو اگر جان گئے ہم
تم یہ نہ سمجھنا کہ برا مان گئے ہم
ہم اور ترے حسن تغافل سے بگڑتے
جب تو نے کہا مان گئے مان گئے ہم

شاد عظیم آبادی

اے شادؔ عبث ہے اس کا گلا وہ ہجو کرے یا تجھ سے پھرے
تا حشر رہا شاگرد ترا استاد تجھے جب مان لیا
جب قتل ہوا میں تڑپا بھی چھینٹیں بھی اڑائیں مان لیا
الزام خود اس پر کیا یہ نہیں دامن کو نہ کیوں گردان لیا

احمد فراز

تجھ پر بھی نہ ہو گمان میرا
اتنا بھی کہا نہ مان میرا
تو آیا تو کب پلٹ کے آیا
جب ٹوٹ چکا تھا مان میرا

فراق گورکھپوری

ہم آہنگی میں بھی اک چاشنی ہے اختلافوں کی
مری باتیں بعنوان دگر وہ مان لیتے ہیں

قتیل شفائی

دیکھ مری ان مول شرافت لٹ بھی گیا شرمندہ بھی ہوں
جیت بھی لی اخلاص کی بازی ہار بھی اپنی مان رہا ہوں