کیا آئینہ دیکھے ہے مری جان ادھر دیکھ
مصحفی غلام ہمدانی
ہم بھی ہیں ترے حسن کے حیران ادھر دیکھ
کیا آئینہ دیکھے ہے مری جان ادھر دیکھ
آنکھیں نہ چرا مجھ سے مری جان ادھر دیکھ
اے میں تری اس چشم کے قربان ادھر دیکھ
ترسوں ہوں تری یک نگہِ لطف کو پیارے
اتنا بھی تو مجھ کو نہ کڑا مان ادھر دیکھ
عاشق تو ہزاروں ہی غرض گزرے ہیں لیکن
یوں چاک ہوا کس کا گریبان ادھر دیکھ
آنکھیں نہ چرا مصحفیٔؔ ریختہ گو سے
اک عمر سے تیرا ہے ثنا خوان ادھر دیکھ
مفعول مفاعیل مفاعیل فَعُولن
ہزج مثمن اخرب مکفوف محذوف