مرزا غالب

کیوں کر اس بت سے رکھوں جان عزیز!
کیا نہیں ہے مجھے ایمان عزیز!
تاب لاتے ہی بنے گی غالب
واقعی سخت ہے اور جان عزیز
ہے کائنات کو حرکت تیرے ذوق سے
پرتو سے آفتاب کے ذرے میں جان ہے

امام بخش ناسخ

آ جائے ابھی جان میں جان آؤ اگر تم
تن ہجر میں بے جان ہے اے جان ہمارا

انشاء اللہ خان انشا

ہاں پھر تو کہیو ہائے وہ کس طرح ہوئے غضب
انشاؔ نہ چھیڑ مجھ کو مری جان کی قسم
سر چشم صبر دل دیں تن مال جان آٹھوں
صدقہ کئی ہیں تم پر لو مہربان آٹھوں
لب پہ آئی ہوئی یہ جان پھرے
یار گر اس طرف کو آن پھرے
ساقیا آج جام صہبا پر
کیوں نہ لہراتی اپنی جان پھرے

داغ دہلوی

میں تم کو ناگوار ہوں دل مجھ کو ناگوار
تم مجھ سے تنگ اور ہوں میں تنگ جان سے
اے داغؔ اس کی خیر مناتا ہے آدمی
کوئی عزیز بڑھ کے نہیں اپنی جان سے
یہ تو بجا کہ آپ کو دنیا سے کیا غرض
جاتی ہے جس کی جان اسے جان جائیے
بے وفائی سے بھی رفتہ رفتہ
وہ مری جان ہوا جاتا ہے
مر گئے ہم مگر ترا ارمان
دل سے نکلا نہ جان سے نکلا
کیا مروت ہے ناوک دل دوز
پہلے ہرگز نہ جان سے نکلا
افشائے رازِ عشق میں گو ذلتیں ہوئیں
لیکن اسے جتا تو دیا جان تو گیا
صاف کب امتحان لیتے ہیں
وہ تو دم دے کے جان لیتے ہیں
تم تغافل کرو رقیبوں سے
جاننے والے جان لیتے ہیں
اپنے بسمل کا سر ہے زانو پر
کس محبت سے جان لیتے ہیں

شیخ ابراہیم ذوق

نگہ کا وار تھا دل پر پھڑکنے جان لگی
چلی تھی برچھی کسی پر کسی کے آن لگی
خدنگ یار مرے دل سے کس طرح نکلے
کہ اس کے ساتھ ہے اے ذوقؔ میری جان لگی

مصحفی غلام ہمدانی

جس روز میرے جسم سے نکلے گی میری جاں
یہ جانیو تو آج گئی جان شاعری
غیر کے گھر تو نہ رہ رات کو مہمان کہیں
تا نا اس بات کا چرچا ہو مری جان کہیں
کھیل جاتے ہیں جان پر عاشق
جان دیتے ہیں آن پر عاشق
ہم بھی ہیں ترے حسن کے حیران ادھر دیکھ
کیا آئینہ دیکھے ہے مری جان ادھر دیکھ
آنکھیں نہ چرا مجھ سے مری جان ادھر دیکھ
اے میں تری اس چشم کے قربان ادھر دیکھ
اس عشق و جنوں میں نہ گریبان کا ڈر ہے
یہ عشق وہ ہے جس میں ہمیں جان کا ڈر ہے

مومن خان مومن

جلا جگر تپ غم سے پھڑکنے جان لگی
الٰہی خیر کہ اب آگ پاس آن لگی

مرزا رفیع سودا

نہیں عیسیٰؔ تو پر سخن سے ترے
تن بے جاں میں جان پڑتی ہے

باقی صدیقی

کچھ طبیعت اداس ہے باقیؔ
آج دیکھا نہیں وہ جانِ غزل

جون ایلیا

جسم مدت تری عقوبت کی
ایک اک لمحہ جان میں گزری

خواجہ میر درد

ربط ہے ناز بتاں کو تو مری جان کے ساتھ
جی ہے وابستہ مرا ان کی ہر اک آن کے ساتھ

شکیب جلالی

ہر آن میرا نیا رنگ ہے یوں ہی‘ نیا چہرہ
وہ بھید ہوں جو کسی سے نہ میری جان‘ کھلا
درد کے موسم کا کیا ہو گا اثر ان جان پر
دوستو‘ پانی کبھی رکتا نہیں ڈھلوان پر

عرفان صدیقی

وحشت کے ساتھ دشت مری جان چاہیے
اس عیش کے لیے سر و سامان چاہیے
جب ستم ہے یہ تعارف ہی تو کیسا ہو، اگر
میں اسے جاننے والوں کی طرح جان سکوں
در پئے جسم و جان ملتے ہیں
ہم کو سب مہربان ملتے ہیں
ابھی تو سب سے بڑا امتحان بیچ میں ہے
ہمارے جسم جدا ہیں کہ جان بیچ میں ہے

جمال احسانی

اپنا جب بوجھ مری جان اٹھانا پڑ جائے
دوسروں کا نہ کچھ احسان اٹھانا پڑ جائے

رئیس فروغؔ

کبھی لباس اور ہوا کبھی زمین اور گھٹا
کسی دیار کی رتیں محبتوں کی جان ہیں
اپنا اپنا دھیان سہی
آج یہی اے جان سہی

اختر شیرانی

میں آرزوئے جاں لکھوں یا جان آرزو!
تو ہی بتا دے ناز سے ایمان آرزو!

زہرا نگاہ

اس کو سمجھے کہ نہ سمجھے لیکن
گردشِ دہر تجھے جان گئے

جلیل مانک پوری

عشق اب میری جان ہے گویا
جان اب میہمان ہے گویا
چلے ہائے دم بھر کو مہمان ہو کر
مجھے مار ڈالا مری جان ہو کر
حواس آتے جاتے رہے روز وعدہ
تری یاد ہو کر مری جان ہو کر

ثروت حسین

پھر وہ برسات دھیان میں آئی
تب کہیں جان جان میں آئی

حفیظ جالندھری

دل ابھی تک جوان ہے پیارے
کس مصیبت میں جان ہے پیارے

رسا چغتائی

پاس اپنے اک جان ہے سائیں
باقی یہ دیوان ہے سائیں
یوں گنواتا ہے کوئی جان عزیز
زندگی ہوتی تو ہم رکھتے عزیز

سیف الدین سیف

در پردہ جفاؤں کو اگر جان گئے ہم
تم یہ نہ سمجھنا کہ برا مان گئے ہم
اب اور ہی عالم ہے جہاں کا دلِ ناداں
اب ہوش میں آئے تو مری جان گئے ہم
چھوڑ کر جاؤں ترے شہر کی گلیاں کیسے
دل یہاں روح یہاں جسم یہاں جان یہاں
دل کی تسکین پوچھتے ہیں آپ
ہاں مری جان ہو گئی ہو گی
ہے ایک شب کی اقامت سرائے دنیا میں
یہ سارا کھیل مری جان ایک رات کا ہے
کھلے گی آنکھ تو سمجھوگے خواب دیکھا تھا
یہ سارا کھیل مری جان ایک رات کا ہے

سلام مچھلی شہری

میں آج زندگی کی کڑی منزلوں میں ہوں
خود کہہ رہا ہوں ملیے تو ان جان کی طرح
لاؤ میں اس کو ساغرِ دل میں سنبھال لوں
بوتل میں اک پری ہے مری جان کی طرح

شاد عظیم آبادی

کہیں مرقد پہ جاتے ہیں کہیں گھر تک نہیں جاتے
کسی کو جان دیتے ہیں کسی کی جان لیتے ہیں
کہے دیتا ہوں قاتل لے خبر جاں باز کی اپنے
فنا شوقِ شہادت میں کسی دن جان کر دے گا

شکیل بدایونی

کچھ نہیں ہستی پروانہ مگر
بزم کی جان ہوا جاتا ہے
غمِ جاناں غمِ ہستی غم حالات شکیلؔ
کیا کہوں کتنی بلائیں ہیں مری جان کے ساتھ

فانی بدایونی

فانیؔ کا دم اک دن ترے قدموں پہ نکل جائے
دل کی یہ تمنا ہے اب اے جان تمنا
رہ جائے یا بلا سے یہ جان رہ نہ جائے
تیرا تو اے ستمگر ارمان رہ نہ جائے

احمد فراز

جینے سے اس قدر بھی لگاؤ نہ تھا مجھے
تو نے تو زندگی کو، میری جان کر دیا
نا آشنائے لطف تصادم کو کیا خبر
میں نے ہوا کی زد پہ رکھا جان کر دیا
ایک ضرب اور بھی اے زندگی تیشہ بدست
سانس لینے کی سکت اب بھی مری جان میں ہے

شاذ تمکنت

دلِ شکستہ ہوئے ٹوٹا ہوا پیمان بنے
ہم وہی ہیں جو تمہیں دیکھ کے ان جان بنے

فراق گورکھپوری

بہت پہلے سے ان قدموں کی آہٹ جان لیتے ہیں
تجھے اے زندگی ہم دور سے پہچان لیتے ہیں
تری مقبولیت کی وجہ واحد تیری رمزیت
کہ اس کو مانتے ہی کب ہیں جس کو جان لیتے ہیں
جسے صورت بتاتے ہیں پتہ دیتی ہے سیرت کا
عبارت دیکھ کر جس طرح معنی جان لیتے ہیں

قتیل شفائی

تیرے در پر عمر کٹی ہے پھر بھی کیا ان جان رہا ہوں
دنیا بھر کے سجدوں میں اپنے سجدے پہچان رہا ہوں

محسن نقوی

یوں بھی کم آمیز تھا محسنؔ وہ اس شہر کے لوگوں میں
لیکن میرے سامنے آ کر اور بھی کچھ ان جان ہوا