جان دیتے ہیں آن پر عاشق
مصحفی غلام ہمدانی
کھیل جاتے ہیں جان پر عاشق
جان دیتے ہیں آن پر عاشق
کوئی ان گالیوں سے ٹلتے ہیں
ہم ہیں تیری زبان پر عاشق
خواری ان عاشقوں کی وے جو ہوئے
تجھ سے ناقدردان پر عاشق
تازہ آفت تو ایک یہ ہے کہ ہم
ہوئے اس نوجوان پر عاشق
جان دینے کو سود جانتے ہیں
ہم ہیں اپنے زیان پر عاشق
اس قدر گرتی ہے کہے تو یہ برق
ہے مرے آشیان پر عاشق
مصحفیؔ گر تو مرد کامل ہے
دل نہ رکھ اس جہان پر عاشق
فاعِلاتن مفاعِلن فِعْلن
خفیف مسدس مخبون محذوف مقطوع