داغ دہلوی

اب وہ یہ کہہ رہے ہیں مری مان جائیے
اللہ تیری شان کے قربان جائیے
گو وعدۂِ وصال ہو جھوٹا مزہ تو ہے
کیوں کر نہ ایسے جھوٹ کے قربان جائیے
دل کو جو دیکھ لو تو یہی پیار سے کہو
قربان جائیے ترے قربان جائیے
دم ذرا لو کہ مرا دم تم پر
ابھی قربان ہوا جاتا ہے
بزمِ عدو میں صورتِ پروانہ دل مرا
گو رشک سے جلا ترے قربان تو گیا

مصحفی غلام ہمدانی

منع کس واسطے کرتا ہے میں تیرے صدقے
عید کے دن تو مجھے ہونے دے قربان کہیں
آنکھیں نہ چرا مجھ سے مری جان ادھر دیکھ
اے میں تری اس چشم کے قربان ادھر دیکھ

بہزاد لکھنوی

تجھ پر مری محبت قربان ہو نہ جائے
یہ کفر بڑھتے بڑھتے ایمان ہو نہ جائے

سیف الدین سیف

پلکوں پہ لرزتے ہوئے تارے سے یہ آنسو
اے حسن پشیماں ترے قربان گئے ہم
پھر پلٹ کر نگہ نہیں آئی
تجھ پہ قربان ہو گئی ہو گی

شکیل بدایونی

اللٰہ اللٰہ کہ انہیں کا پرتو
ان پہ قربان ہوا جاتا ہے

قتیل شفائی

ہر شے سے مقدس ہے خیالات کا رشتہ
کیوں مصلحتوں پر اسے قربان کیا جائے