امام بخش ناسخ

ہاتھوں کی شکایت ہے ہمیں دشتِ جنوں میں
پاؤں میں الجھتا ہے گریبان ہمارا

انشاء اللہ خان انشا

داماں کو میری ہاتھ سے اس رات مت جھٹک
تجھ کو سحر کے چاک گریبان کی قسم

بہادر شاہ ظفر

کس طرح لگاوے کوئی داماں کو ترے ہاتھ
ہونے کو تو اب دست و گریبان ہے موجود

داغ دہلوی

غصے میں ہاتھ سے یہ نشانی نہ گر پڑے
دامن میں لے کے میرا گریبان جائیے

مصحفی غلام ہمدانی

رہتے ہیں اینچا تانی میں اب اس کے اور یار
تھا ہاتھ میں مرے جو گریبان شاعری
اب تلک غنچے کی گردن ہے جھکی خجلت سے
اس نے دیکھی تھی تری گوئے گریبان کہیں
عاشق تو ہزاروں ہی غرض گزرے ہیں لیکن
یوں چاک ہوا کس کا گریبان ادھر دیکھ
اس عشق و جنوں میں نہ گریبان کا ڈر ہے
یہ عشق وہ ہے جس میں ہمیں جان کا ڈر ہے

خواجہ میر درد

اپنے ہاتھوں کے بھی میں زور کا دیوانہ ہوں
رات دن کشتی ہی رہتی ہے گریبان کے ساتھ

عرفان صدیقی

کمزور طائروں کو لہو کی ترنگ نے
شاہیں بچوں سے دست و گریبان کر دیا
اگلے موسم میں ہماری کوئی پہچان تو ہو
ان کو محفوظ رکھیں تار گریبان جو ہیں

عالم تاب تشنہ

باندھیں کسی سے عہدِ وفا ہم تو کس طرح
اک تار بھی تو اپنے گریبان میں نہیں

جلیل مانک پوری

نہ آخر بچا پردۂ راز دشمن
ہوا چاک میرا گریبان ہو کر

سیف الدین سیف

ٹوٹ جائے تو اسے دل کا لقب ملتا ہے
چاک ہو جائے تو ہوتا ہے گریبان یہاں

احمد فراز

ہم تو یوں خوش تھے کہ اک تار گریبان میں ہے
کیا خبر تھی کہ بہار اس کے بھی ارمان میں ہے
خلقت شہر کے ہر ظلم کے با وصف فرازؔ
ہائے وہ ہاتھ کہ اپنے ہی گریبان میں ہے

شاذ تمکنت

وہ بھی کیا فصل تھی کیا شعلۂ خرمن تھا بلند
وہ بھی کیا دن تھے کہ دامن سے گریبان بنے

قتیل شفائی

وہ شخص جو دیوانوں کی عزت نہیں کرتا
اس شخص کا بھی چاک گریبان کیا جائے