داغ دہلوی

کسی طرح جو نہ اس بت نے اعتبار کیا
مری وفا نے مجھے خوب شرمسار کیا
ذکر مہر و وفا تو ہم کرتے
پر تمہیں شرمسار کون کرے

مومن خان مومن

کوئے دشمن میں جا پکڑتا کیوں
کیا مجھے شرمسار ہونا تھا
جو تیرے منہ سے نہ ہو شرمسار آئینہ
تو رخ کرے سوئے آئینہ وار آئینہ

باقی صدیقی

کبھی حرم پہ کبھی بتکدے پہ بار ہوا
کہیں کہاں ترا دیوانہ شرمسار ہوا

اختر شیرانی

خدا نے بخش دیے میرے دل کو غم اتنے
کہ اب میں اپنے گناہوں پہ شرمسار نہیں

ادا جعفری

ہتھیلیوں پہ چراغ دعا سجائے ہوئے
ملے نگار بہاراں تو شرمسار ملے

سید ضمیر جعفری

ملی ہیں نوعِ بشر سے مجھے وہ ایذائیں
کہ جب بھی غور کیا خود بھی شرمسار ہوا

سیماب اکبر آبادی

مجھ کو مٹا گئی روش شرمگیں تری
میں جذب ہو گیا نگۂ شرمسار میں

شاد عظیم آبادی

جوابِ خط کا نہ قاصد سے ماجرا پوچھو
ہے صاف چہرہ سے ظاہر کہ شرمسار آیا

امیر مینائی

دمِ نزع بھی جو وہ بت مجھے آ کے منہ دکھاتا
تو خدا کے منہ سے اتنا نہ میں شرمسار ہوتا

شاذ تمکنت

ہمیں کم ملیں سزائیں کہ زیادہ تھیں خطائیں
ترے سہو کیا گنائیں ترے شرمسار چپ تھے

فراق گورکھپوری

لطف ساماں عتاب یار بھی ہے
محرم عشق شرمسار بھی ہے
کوئی سمجھا اسے نہ دیکھ سکا
نگۂ شوخ شرمسار بھی ہے