داغ دہلوی

وہ ہی ہمارا طریق الفت کہ دشمنوں سے بھی مل کے چلنا
یہ ایک شیوہ ترا ستم گر کہ دوست سے دوستی نہ کرنا

مصطفیٰ زیدی

آج کل آپ کی خبر ہم کو!
غیر کی دوستی سے ملتی ہے

احسان دانش

ہمیں دعویٰ نہیں تنہا نباہی دوستی ہم نے
محبت کو سنبھالا ہے کبھی تم نے کبھی ہم نے

بشیر بدر

محبتوں میں دکھاوے کی دوستی نہ ملا
اگر گلے نہیں ملتا تو ہاتھ بھی نہ ملا

ضیا جالندھری

کر گئے کس قدر تباہ ضیاؔ
دشمن انداز دوستی سے مجھے

ظہیر کاشمیری

مگر تم بھی تو اک بوئے گریزاں کی طرح نکلے
گزرنے کو گزر جاتی بہار دوستی اپنی
ظہیرؔ اس چشم اول پہ یوں ہی محسوس ہوتا ہے
بڑی مدت سے ہے جیسے کسی سے دوستی اپنی

جلیل مانک پوری

مٹتی نہیں دشمنی کسی کی
رنگ اس میں ہے میری دوستی کا
کھینچیں جو وہ تیر دل بھی دے ساتھ
حق کچھ تو ادا ہو دوستی کا

عزیز حامد مدنی

تعلقات زمانہ کی اک کڑی کے سوا
کچھ اور یہ ترا پیمان دوستی بھی نہیں

احمد فراز

اول اول کی دوستی ہے ابھی
اک غزل ہے کہ ہو رہی ہے ابھی
ہم کو آساں ہیں اور ہمارے لیے
دشمنی دوستی سے مشکل ہے

فراق گورکھپوری

تیرے پاس آیا ہوں کہنے ایک بات
مجھ کو تیری دوستی درکار ہے

قابل اجمیری

طلوعِ صبح پہ ہوتی ہے اور بھی نمناک
وہ آنکھ جس کی ستاروں سے دوستی ہو جائے

کیف بھوپالی

تجھے کون جانتا تھا مری دوستی سے پہلے
ترا حسن کچھ نہیں تھا مری شاعری سے پہلے

ناصر کاظمی

دوستوں کے درمیاں
وجہِ دوستی ہے تو