داغ دہلوی

زیست سے تنگ ہیں نہ چھیڑ ہمیں
دیکھ غصہ حرام ہوتا ہے
کچھ زہر نہ تھی شراب انگور
کیا چیز حرام ہو گئی ہے

فیض احمد فیض

فقیہہِ شہر سے مے کا جواز کیا پوچھیں
کہ چاندنی کو بھی حضرت حرام کہتے ہیں
یہ برہمن کا کرم، وہ عطائے شیخِ حرم
کبھی حیات کبھی مے حرام ہوتی رہی

باقی صدیقی

کس کا وعدہ کیسی تمنا، اٹھ اے دل آرام کریں
ان کو بات کا پاس نہیں تو ہم کیوں نیند حرام کریں

جون ایلیا

پوچھ نہ وصل کا حساب حال ہے اب بہت خراب
رشتۂ جسم و جاں کے بیچ جسم حرام ہو گیا

جگر مراد آبادی

یہ ہے مے کدہ یہاں رند ہیں یہاں سب کا ساقی امام ہے
یہ حرم نہیں ہے اے شیخ جی یہاں پارسائی حرام ہے
یہ جنابِ شیخ کا فلسفہ ہے عجیب سارے جہان سے
جو وہاں پیو تو حلال ہے جو یہاں پیو تو حرام ہے

عبدالحمید عدم

مے اور حرام؟ حضرت زاہد خدا کا خوف
وہ تو کہا گیا تھا کہ مستی حرام ہے

عرفان صدیقی

غزال آتے بھی ہیں زیرِ دام جانتا ہوں
مگر یہ رزق میں خود پر حرام جانتا ہوں

بہزاد لکھنوی

وہاں پہ چل مجھے لے کر مرے سمند خیال
جہاں نگاہ کی مستی حرام ہوتی ہے

بشیر بدر

یہاں ایک بچے کے خون سے جو لکھا ہوا ہے اسے پڑھیں
ترا کیرتن ابھی پاپ ہے ابھی میرا سجدہ حرام ہے

زہرا نگاہ

گردش مینا و جام دیکھیے کب تک رہے
ہم پہ تقاضا حرام دیکھیے کب تک رہے

ثروت حسین

کیوں کسی شب چراغ کی خاطر
اپنی نیندیں حرام کرنے لگا

جوش ملیح آبادی

رکے نہ دور کہ اب تک بہ زیر چرخ کبود
ریا حلال ہے صہبا حرام ہے ساقی
عجب نہیں کہ تجھے بھی پسند آئے یہ قول
جھکے نہ دل تو عبادت حرام ہے ساقی

حسرت موہانی

جو اور کچھ ہو تری دید کے سوا منظور
تو مجھ پہ خواہش جنت حرام ہو جائے

فانی بدایونی

جو عبارت نہ ہو ترے غم سے
اہلِ دل پر وہ زندگی ہے حرام
یہ بحث و تکرار چھوڑ دے آ یہ زہد کا عہد توڑ دے
رہے گی اے مدعی حرمت شراب دنیا حرام کب تک

ناصر کاظمی

جدا ہوئے ہیں بہت لوگ ایک تم بھی سہی
اب اتنی بات پہ کیا زندگی حرام کریں