داغ دہلوی

عجب اپنا حال ہوتا، جو وصالِ یار ہوتا
کبھی جان صدقے ہوتی، کبھی دل نثار ہوتا
تم تو ہو جان اک زمانے کی
جان تم پر نثار کون کرے
ان کے اک جاں نثار ہم بھی ہیں
ہیں جہاں سو ہزار ہم بھی ہیں

مصحفی غلام ہمدانی

اوروں سا نہ جان مجھ کو پیارے
یہ عاشق جاں نثار ہے اور

مومن خان مومن

مرگ شام وصال حرماں ہے
صبح دم جاں نثار ہونا تھا
کہے ہے دیکھ کے رخسارِ یار آئینہ
کہ اس صفائی پہ صدقے نثار آئینہ

فیض احمد فیض

ترے غم کو جاں کی تلاش تھی ترے جاں نثار چلے گئے
تری رہ میں کرتے تھے سر طلب، سرِ رہگزار چلے گئے

مرزا رفیع سودا

کھینچی ہے بھواں نے تیغ مکھ پر
سوداؔ سے کہو نثار ہووے

جون ایلیا

سہہ بھی لیتے ہمارے طعنوں کو
جانِ من جاں نثار تھے ہم تو
کون ہے جس کو جاں عزیز نہیں
لے ترا جاں نثار اٹھتا ہے

قمر جلالوی

سب نے کیے ہیں باغ میں ان پر نثار پھول
اے سرو آ تجھے بھی دلا دوں ہزار پھول

بہزاد لکھنوی

کافر کی چشم ناز پہ کیا دل جگر کا ذکر
ایمان تک نثار کیا ہائے کیا کیا

بیان میرٹھی

کچھ ایسی چیز نہ تھے دو جہان کیا ہوتے
دکھا کے آئنہ تم پر تمہیں نثار کیا

بیخود بدایونی

یوں ہی رہا جو بتوں پر نثار دل میرا
کرے گا مجھ کو زمانے میں خوار دل میرا