داغ دہلوی

گو حالِ دل چھپاتے ہیں پر اس کو کیا کریں
آتے ہیں خود بہ خود نظر اک مبتلا سے ہم
مجبور اپنی شیوۂِ شرم و حیا سے تم
ناچار اضطرابِ دلِ مبتلا سے ہم

مومن خان مومن

میں کینے سے بھی خوش ہوں کہ سب یہ تو کہتے ہیں
اس فتنہ گر کو لاگ ہے اس مبتلا کے ساتھ
جسے آپ گنتے تھے آشنا جسے آپ کہتے تھے با وفا
میں وہی ہوں مومنؔ مبتلا تمہیں یاد ہو کہ نہ یاد ہو

یگانہ چنگیزی

بتاؤ ایسے بندے پر ہنسی آئے کہ غیظ آئے
دعا مانگے مصیبت میں جو قصداً مبتلا ہو کر

جون ایلیا

اب تو کچھ بھی نہیں ہوں میں ویسے
کبھی وہ بھی تھا مبتلا میرا

جگر مراد آبادی

نہ پا لینا ترا آساں نہ کھو دینا ترا ممکن
مصیبت میں یہ جان مبتلا یوں بھی ہے اور یوں بھی

مصطفی زیدی

ہزار شعر کہے یوں تو کہنے والوں نے
کسی کسی نے دلِ مبتلا سے باتیں کیں

اکبر معصوم

ایسا مردہ تھا میں کہ جینے کے
خوف میں مبتلا رہا ہوں میں

بیخود بدایونی

اس ذوق ابتلا کا مزہ اس کے دم سے ہے
سب کچھ ملا ملا ہو دل مبتلا مجھے

ظہیر کاشمیری

قائم اسی کی ذات سے ہے ربط زندگی
اے دوست احترام دلِ مبتلا کرو

حسرت موہانی

تجھ سے گرویدہ یک زمانہ رہا
کچھ فقط میں ہی مبتلا نہ رہا
نہیں معلوم کیا اے شاہِ خوباں
تجھے کچھ حال اپنے مبتلا کا
خاطر محروم کو کر دیجیے محو الم
درپئے ایذائے جان مبتلا ہو جائیے

حفیظ جالندھری

الٰہی ایک غمِ روزگار کیا کم تھا
کہ عشق بھیج دیا جان مبتلا کے لیے

رسا چغتائی

جنوں کیسا کہاں کا عشق صاحب
میں اپنے آپ ہی میں مبتلا ہوں

فانی بدایونی

وہی تو ہے وہی تری محفل
ایک فانیؔ مبتلا ہی نہیں
ادا کو ادا آشنا چاہتا ہوں
تجھی پر تجھے مبتلا چاہتا ہوں
مجھ کو مرے نصیب نے روزِ ازل سے کیا دیا
دولت دو جہاں نہ دی اک دلِ مبتلا دیا

احمد فراز

ہم بھی مجبوریوں کا عذر کریں
پھر کہیں اور مبتلا ہو جائیں

شاذ تمکنت

خود اپنا حالِ دلِ مبتلا سے کچھ نہ کہا
دعا سے ہاتھ اٹھائے خدا سے کچھ نہ کہا