شیخ ابراہیم ذوق

لے کر بتوں نے جان جب ایماں پہ ڈالا ہاتھ
دل کیا کنارے ہو گیا سب کو سنبھال کر

عبدالحمید عدم

تھوڑے سے فاصلے میں بھی حائل ہیں لغزشیں
ساقی سنبھال کر مرے ساقی سنبھال کر
زلف برہم سنبھال کر چلئے
راستہ دیکھ بھال کر چلئے
یا دوپٹہ نہ لیجیے سر پر
یا دوپٹہ سنبھال کر چلئے

عبید اللہ علیم

سخن میں سہل نہیں جاں نکال کر رکھنا
یہ زندگی ہے ہماری سنبھال کر رکھنا

تلوک چند محروم

خدا سے وقت دعا ہم سوال کر بیٹھے
وہ بت بھی دل کو ذرا اب سنبھال کر بیٹھے

رسا چغتائی

سامنے جی سنبھال کر رکھنا
پھر وہی اپنا حال کر رکھنا
شام ہی سے برس رہی ہے رات
رنگ اپنے سنبھال کر رکھنا

عزیز حامد مدنی

اسی نگاہ کی نرمی سے ڈگمگائے قدم
اسی نگاہ کے تیور سنبھال سے بھی گئے

فانی بدایونی

دیکھ دل کی زمیں لرزتی ہے
یاد جاناں قدم سنبھال اپنا

احمد فراز

لے اڑا پھر کوئی خیال ہمیں
ساقیا ساقیا سنبھال ہمیں
خلوتی ہیں ترے جمال کے ہم
آئنے کی طرح سنبھال ہمیں
اگرچہ زور ہواؤں نے ڈال رکھا ہے
مگر چراغ نے لو کو سنبھال رکھا ہے
سبھی کے ہاتھ دلوں پر نگاہ تجھ پر ہے
قدح بدست ہے ساقی قدم سنبھال کے رکھ

کلیم عاجز

تپش پتنگوں کو بخش دیں گے لہو چراغوں میں ڈھال دیں گے
ہم ان کی محفل میں رہ گئے ہیں تو ان کی محفل سنبھال دیں گے

محبوب خزاں

دیکھ دریا ہے کنارے کو سنبھال
یہ محبت یہ محبت کا زوال

محسن نقوی

اے گرد باد لوٹ کے آنا ہے پھر مجھے
رکھنا مرے سفر کی اذیت سنبھال کر