شیخ ابراہیم ذوق

تم نے تو چھوڑا ہی تھا اے ہم رہان قافلہ
لیکن آوازِ جرس ہم کو جگا کر لے گئی

مصحفی غلام ہمدانی

رکھتے ہی در سے پا بروں لے گئے صبر اور سکوں
فتنۂِ خفتہ تھا جنوں پھر وہ اسے جگا گئے
ٹھوکر سے اپنے پانو کے گلشن میں خوش قداں
صد فتنہ ہائے خفتہ جگا کر چلے گئے
کرنے دے میرے خون کو آرام خاک میں
اے شورِ حشر اس کو ابھی مت جگا سرک

میر مہدی مجروح

اک عمر کے دکھ پائے سوتے ہیں فراغت سے
اے غلغلۂِ محشر ہم کو نہ جگا جانا

باقی صدیقی

ہم دیکھ کر جہاں کو ہراساں ہیں اس طرح
یک لخت جیسے کوئی جگا کر چلا گیا

جگر مراد آبادی

آنکھوں میں بس کے دل میں سما کر چلے گئے
خوابیدہ زندگی تھی جگا کر چلے گئے
کوئی یہ لوٹ تو دیکھے کہ اس نے جب چاہا
تمام ہستی دل کو جگا کے لوٹ لیا

خواجہ میر درد

دل مرا پھر دکھا دیا کن نے
سو گیا تھا جگا دیا کن نے

شکیب جلالی

شکیبؔ‘ دیپ سے لہرا رہے ہیں پلکوں پر
دیارِ چشم میں کیا آج رت جگا ہے کوئی!

مجید امجد

خیال صبحوں، کرن ساحلوں کی اوٹ سدا
میں موتیوں جڑی بنسی کی لے جگا رکھتا

رئیس فروغؔ

اوس میں بھیگے شہر سے باہر آتے دن سے ملنا ہے
صبح تلک سنسار رہے تو ہم کو جلد جگا دینا

احسان دانش

بستیاں آگ میں بہہ جائیں کہ پتھر برسیں
ہم اگر سوئے ہوئے ہیں تو جگا دو ہم کو

اختر شیرانی

عشق کو نغمۂ امید سنا دے آ کر
دل کی سوئی ہوئی قسمت کو جگا دے آ کر
وہ سرمستیاں بخش اے رشک شیریں
کہ خسرو کو خوابِ عدم سے جگا دیں

فارغ بخاری

تیری خاطر یہ فسوں ہم نے جگا رکھا ہے
ورنہ آرائش افکار میں کیا رکھا ہے

احمد راہی

کسی بچھڑے ہوئے کھوئے ہوئے ہم دم کا خیال
کتنے سوئے ہوئے جذبوں کو جگا دیتا ہے

جوش ملیح آبادی

سو چکی ہے جو اک زمانے سے
اس خلش کو جگا رہا ہے یہ کون

حسرت موہانی

سخت بے درد ہے تاثیر محبت کہ انہیں
بستر ناز پہ سوتے سے جگا رکھا ہے

سیف الدین سیف

شور دن کو نہیں سونے دیتا
شب کو سناٹا جگا دیتا ہے