شیخ ابراہیم ذوق

دکھلاتا اک ادا میں ہے سو سو طرح بناؤ
اس سادہ پن کے ساتھ ترا بانکپن مجھے

عرفان صدیقی

سبک نہ تھا ترا بازوئے تیغ زن اتنا
ترے ہنر میں مرے بانکپن کا جادو ہے
تجھے بھی تیغ کشیدہ کبھی زوال نہ ہو
دل کشادہ، ترا بانکپن بھی زندہ رہے

احمد فراز

وہ جس غرور اور ناز سے تم چلے گئے تھے
کبھی اسی تمکنت اسی بانکپن میں آؤ

امیر مینائی

تلوار چل رہی ہے کہ یہ تیری چال ہے
اے بت خدا کے واسطے اس بانکپن کو چھوڑ

شاذ تمکنت

مرے دل کی آب و ہوا لگی کہ وفا بھی ان کو خطا لگی
وہی سادگی سے جو آئے تھے وہی بانکپن سے چلے گئے
حد ادب سے گریزاں نہ ہو سکا کوئی
کہ سادگی میں ترا بانکپن ہی ایسا تھا

مجروح سلطان پوری

ہجوم دہر میں بدلی نہ ہم سے وضع خرام
گری کلاہ ہم اپنے ہی بانکپن میں رہے
سر پر ہوائے ظلم چلے سو جتن کے ساتھ
اپنی کلاہ کج ہے اسی بانکپن کے ساتھ

ناصر کاظمی

تو ہے دلوں کی روشنی تو ہے سحر کا بانکپن
تیری گلی گلی کی خیر اے مرے دل ربا وطن
زباں سخن کو سخن بانکپن کو ترسے گا
سخن کدہ مری طرزِ سخن کو ترسے گا