مصحفی غلام ہمدانی

در تلک آ کے ٹک آواز سنا جاؤ جی
اپنے مشتاق کو اتنا بھی نہ ترساؤ جی
مجھ سے کیا پوچھو ہو کیا جی میں ترے ہے سچ کہہ
ہے جو کچھ جی میں مرے تم ہی سمجھ جاؤ جی
دور سے مجھ کو نہ منہ اپنا دکھاؤ جاؤ
بس جی بس دیکھ لیا میں تمہیں جاؤ جاؤ
''جاؤں جاؤں'' ہی جو کرتے ہو تو مانع ہے کون
جاؤ مت جاؤ جو جاتے ہو تو جاؤ جاؤ
میں تو جانے کا نہیں رو بہ رو اس کے یارو
کچھ وہ گر تم سے کہے ہے تو تمہیں جاؤ سنو
بیٹھے رہو میرے سامنے تم
از بہرِ خدا نہ جاؤ صاحب

میر مہدی مجروح

اس کے جو جو کہ فوائد ہیں خود دیکھتے جاؤ
سچ کہا ہے یہ کسی نے کہ پیو اور پلاؤ
ضبط سرکار میں ہونے کے لیے چھوڑ نہ جاؤ
خوب ہی کھاؤ زر و مال کو اور خوب اڑاؤ

مصطفیٰ زیدی

وہ عہد عہد ہی کیا ہے جسے نبھاؤ بھی
ہمارے وعدۂ الفت کو بھول جاؤ بھی

بشیر بدر

ہمارے پاس تو آؤ بڑا اندھیرا ہے
کہیں نہ چھوڑ کے جاؤ بڑا اندھیرا ہے

عبید اللہ علیم

کچھ دن تو بسو مری آنکھوں میں
پھر خواب اگر ہو جاؤ تو کیا
ہے یوں بھی زیاں اور یوں بھی زیاں
جی جاؤ تو کیا مر جاؤ تو کیا
تمہارا سر نہیں طفلان رہ گزر کے لیے
دیار سنگ میں گھر سے نکل کے جاؤ مت

اختر امام رضوی

توڑ بھی دو احساس کے رشتے چھوڑ بھی دو دکھ اپنانے
رو رو کے جیون کاٹو گے رو رو کے مر جاؤ گے

احمد فراز

اس کا کیا ہے تم نہ سہی تو چاہنے والے اور بہت
ترکِ محبت کرنے والو! تم تنہا رہ جاؤ گے
ہجر کے ماروں کی خوش فہمی! جاگ رہے ہیں پہروں سے
جیسے یوں شب کٹ جائے گی، جیسے تم آ جاؤ گے

قتیل شفائی

یہ کس نے کہا تم کوچ کرو باتیں نہ بناؤ انشاؔ جی
یہ شہر تمہارا اپنا ہے اسے چھوڑ نہ جاؤ انشاؔ جی
تم لاکھ سیاحت کے ہو دھنی اک بات ہماری بھی مانو
کوئی جا کے جہاں سے آتا نہیں اس دیس نہ جاؤ انشاؔ جی
چھٹ گئے حالات کے بادل تو دیکھا جائے گا
وقت سے پہلے اندھیرے میں نہ جاؤ چپ رہو

ناصر کاظمی

درد کم ہونے لگا آؤ کہ کچھ رات کٹے
غم کی میعاد بڑھا جاؤ کہ کچھ رات کٹے
میں بھی بے کار ہوں اور تم بھی ہو ویران بہت
دوستو آج نہ گھر جاؤ کہ کچھ رات کٹے