مصحفی غلام ہمدانی

چلے ہے روز غیروں کے گلے پر تیغ تیز اس کی
لہو کے گھونٹ کس دن عاشق شیدا نہیں پیتا
گرچہ اے دلِ عاشق شیدا ہے تو
لیکن اپنے کام میں یکتا ہے تو

احسان دانش

ذرے ذرے نے مرا افسانہ سن کر داد دی
میں نے وحشت میں جہاں کو تیرا شیدا کر دیا

جلیل مانک پوری

میں کہاں چاہت کہاں یہ سب کرشمے دل کے ہیں
تم پہ خود شیدا ہوا مجھ کو بھی شیدا کر دیا

حسرت موہانی

کیا تم کو علاج دل شیدا نہیں آتا
آتا ہے پر اس طرح کہ گویا نہیں آتا
حسنِ بے مہر کو پروائے تمنا کیا ہو
جب ہو ایسا تو علاج دل شیدا کیا ہو

شاد عظیم آبادی

کیا فقط طالبِ دیدار تھا موسیٰ تیرا
وہی شیدا تھا ترا میں نہیں شیدا تیرا
تجھ سے ملنے کا جو ہے شوق تو در در نہ پھرے
پانو توڑے ہوئے بیٹھا رہے شیدا تیرا
اس پہ کیا زور بھلا جس پہ ہو اس کا قابو
چشمِ شوق اپنی سہی دل تو ہے شیدا تیرا