مصحفی غلام ہمدانی

چلتے ہی ترے بام پہ آیا ہے وہ کافر
کیوں اتنے قدم جلد اٹھاتا ہے کھڑا ہو

باقی صدیقی

وقف رستے میں کھڑا ہے کہ نہیں
دل سے اب پوچھ خدا ہے کہ نہیں
وقت چپ سا کھڑا ہے رستے میں
دشت کیسا پڑا ہے رستے میں

جمال احسانی

میں بوندا باندی کے درمیان اپنے گھر کی چھت پر کھڑا رہا ہوں
چراغ تھا کوئی جس کے ہمراہ رات بھر بھیگتا رہا ہوں

رئیس فروغؔ

جو ہے سو پسنجر ہے مگر فرق تو دیکھو
بیٹھا ہے کوئی بس میں کوئی بس میں کھڑا ہے

بشیر بدر

کئی میل ریت کو کاٹ کر کوئی موج پھول کھلا گئی
کوئی پیڑ پیاس سے مر رہا ہے ندی کے پاس کھڑا ہوا
اندھیری رات کا تنہا مسافر
مری پلکوں پہ اب سہما کھڑا ہے

ماجد صدیقی

یہ کس طرح کی ہے دل سوزی و خنک نظری
یہ آ کے کون سے اعراف پر کھڑا ہوں میں

اختر ہوشیارپوری

در و دیوار پہ اک سایہ پڑا ہے دیکھو
میرے رستے میں کوئی جیسے کھڑا ہے دیکھو
اس قدر بھیڑ ہے رستے میں کہ چلنا ہے محال
اور بادل کہ ابھی سر پہ کھڑا ہے دیکھو
کوئی تو آئے مجھے آ کے بچائے اس سے
میری دہلیز پہ اک شخص کھڑا ہے دیکھو
کب دھوپ چلی شام ڈھلی کس کو خبر ہے
اک عمر سے میں اپنے ہی سائے میں کھڑا ہوں
موسم کا حبس شب کی سیاہی فصیل شہر
مجرم تھا سر جھکائے کھڑا عمر بھر رہا

قتیل شفائی

پہنچا جو تیرے در پہ تو محسوس یہ ہوا
لمبی سی ایک قطار میں جیسے کھڑا ہوں میں

محسن نقوی

زباں رکھتا ہوں لیکن چپ کھڑا ہوں
میں آوازوں کے بن میں گھر گیا ہوں

ناصر کاظمی

تیرے گھر کے دروازے پر
سورج ننگے پاؤں کھڑا تھا
ٹھنڈی دھوپ کی چھتری تانے
پیڑ کے پیچھے پیڑ کھڑا تھا
کھڑکی کھول کے دیکھ تو باہر
دیر سے کوئی شخص کھڑا ہے