مومن خان مومن

واعظ کے ذکر مہر قیامت کو کیا کہوں
عالم شبِ وصال کے آنکھوں میں چھا گئے

جگر مراد آبادی

جب عشق اپنے مرکز اصلی پہ آ گیا
خود بن گیا حسین دو عالم پہ چھا گیا
میرا کمال شعر بس اتنا ہے اے جگرؔ
وہ مجھ پہ چھا گئے میں زمانے پہ چھا گیا

خواجہ میر درد

سینہ و دل حسرتوں سے چھا گیا
بس ہجومِ یاس جی گھبرا گیا

عبدالحمید عدم

بکھرنا اور پھر ان گیسوؤں کا
دو عالم پر اندھیرا چھا رہا ہے
کچھ اس پاکیزگی سے کی ہے توبہ
خیالوں پر نشہ سا چھا رہا ہے

اختر شیرانی

جھوم کر بدلی اٹھی اور چھا گئی
ساری دنیا پر جوانی آ گئی
عالم مستی کی توبہ الاماں
پارسائی نشہ بن کر چھا گئی
پارسائی کی جوانمرگی نہ پوچھ
توبہ کرنی تھی کہ بدلی چھا گئی

اسرار الحق مجاز

دھواں سا اک سمت اٹھ رہا ہے شرارے اڑ اڑ کے آ رہے ہیں
یہ کس کی آہیں یہ کس کے نالے تمام عالم پہ چھا رہے ہیں

ظہیر کاشمیری

پھر کسی نے چھیڑ دی عذر جہاں کی داستاں
دل پہ جیسے بھیگی بھیگی بدلیاں سی چھا گئیں

جوش ملیح آبادی

ہوائیں زور کتنا ہی لگائیں آندھیاں بن کر
مگر جو گھر کے آتا ہے وہ بادل چھا ہی جاتا ہے
موج دریا پہ چھا رہا ہے یہ کون
سیج پر رسمسا رہا ہے یہ کون

شکیل بدایونی

روح کو تڑپا رہی ہے ان کی یاد
درد بن کر چھا رہی ہے ان کی یاد

فراق گورکھپوری

جھوم کے پھر چلیں ہوائیں وجد میں آئیں پھر فضائیں
پھر تری یاد کی گھٹائیں سینوں پہ چھا کے رہ گئیں