مرزا غالب

مے خانۂِ جگر میں یہاں خاک بھی نہیں
خمیازہ کھینچے ہے بتِ بیدادِ فن ہنوز

بہادر شاہ ظفر

پر غرور و پر تکبر پر جفا و پر ستم
پر فریب و پر دغا پر مکر و پر فن آپ ہیں

حیدر علی آتش

مفسدے جو کہ ہوں اس چشم سیہ سے کم ہیں
فتنہ پردازی جسے کہتے ہیں فن ہے کس کا

مصطفٰیٰ خان شیفتہ

مشاطہ کا قصور سہی سب بناؤ میں
اس نے ہی کیا نگہ کو بھی پر فن بنا دیا

سراج الدین ظفر

آپ ہی آپ جو کھل جائے تری زلفِ دراز
ناگہاں بے ہنری نقطۂ فن تک پہنچے

عرفان صدیقی

ہائے وہ جسم کہ اک جی کی جلن وہ بھی ہے
اور سچ پوچھو تو سرمایۂ فن وہ بھی ہے

مصطفیٰ زیدی

فن کار خود نہ تھی مرے فن کی شریک تھی
وہ روح کے سفر میں بدن کی شریک تھی

احسان دانش

ہر گام ہر مقام پہ کوشش کے باوجود
دانشؔ نہ آ سکا مجھے جینے کا فن ابھی
ترے کمال کے دھبے ترے عروج کے داغ
چھپائے گا تو کوئی اہلِ فن چھپائے گا

ادا جعفری

شاخوں کا رنگ روپ خزاں لے گئی مگر
انداز آج بھی وہی اربابِ فن سا ہے

عبید اللہ علیم

شکستِ جاں سے سوا بھی ہے کار فن کیا کیا
عذاب کھینچ رہا ہے مرا بدن کیا کیا

حسرت موہانی

اک رنگ التفات بھی اس بے رخی میں تھا
اک سادگی بھی اس نگہ سحر فن میں تھی
فتنۂ جاں وہ سخن دل پذیر
دشمنِ دیں وہ نگہ سحر فن

احمد فراز

ہم بھی شاعر تھے کبھی جانِ سخن یاد نہیں
تجھ کو بھولے ہیں تو دل داری فن یاد نہیں

شاذ تمکنت

دھواں دل سے اٹھے چہرے تک آئے نور ہو جائے
بڑی مشکل سے آتا ہے یہ فن آہستہ آہستہ
مدتوں بعد تجھے دیکھ کے یاد آتا ہے
میں نے سیکھا تھا لہو رونے کا فن پہلے بھی
حقیقتوں میں بھی تھی شاذؔ رنگ آمیزی
قصیدۂ لب و عارض کا فن ہی ایسا تھا

کیفی اعظمی

وہ بھی سراہنے لگے اربابِ فن کے بعد
دادِ سخن ملی مجھے ترک سخن کے بعد

محسن نقوی

پہلے نہ کوئی رمز سخن تھی نہ کنایہ
اب نقطۂ تکمیل ہنر محور فن تو

ناصر کاظمی

گل ریز میری نالہ کشی سے ہے شاخ شاخ
گل چیں کا بس چلے تو یہ فن مجھ سے چھین لے
انہی کے دم سے فروزاں ہیں ملتوں کے چراغ
زمانہ صحبت اربابِ فن کو ترسے گا