مرزا غالب

نہ لیوے گر خسِ جوہر طراوت سبزۂِ خط سے
لگادے خانۂِ آئینہ میں روئے نگار آتش

جون ایلیا

بزم سے جب نگار اٹھتا ہے
میرے دل سے غبار اٹھتا ہے

جگر مراد آبادی

مرے اشکِ خوں کی بہار ہے کہ مرقع غمِ یار ہے
مری شاعری بھی نثار ہے مری چشم سحر نگار پر
یہ فریب جلوہ ہے سر بسر مجھے ڈر یہ ہے دل بے خبر
کہیں جم نہ جائے تری نظر انہیں چند نقش و نگار پر

عبدالحمید عدم

سو کے جب وہ نگار اٹھتا ہے
مثل ابرِ بہار اٹھتا ہے

اسرار الحق مجاز

رخصت اے ہم سفرو شہر نگار آ ہی گیا
خلد بھی جس پہ ہو قرباں وہ دیار آ ہی گیا
ہو گئی تشنہ لبی آج رہین کوثر
میرے لب پر لب لعلین نگار آ ہی گیا

علی سردار جعفری

کوئی معشوق سزا وار غزل ہے شاید
ہم غزل لے کے سوئے شہر نگار آتے ہیں

غلام محمد قاصر

برگ و گل و طیور سب شاخوں کی سمت اڑ گئے
قصر جہاں پناہ میں نقش و نگار بھی نہیں

تلوک چند محروم

زوال حسن کو حسن نگار کیا جانے
خزاں قدم بہ قدم ہے بہار کیا جانے

حسرت موہانی

جلائے شوق سے آئینہ تصویر خاطر میں
نمایاں ہو چلا روئے نگار آہستہ آہستہ