فیض احمد فیض

تری نظر کا گلہ کیا؟ جو ہے گلہ دل کا
تو ہم سے ہے ، کہ تمنا زیادہ رکھتے ہیں
کسی گماں پہ توقع زیادہ رکھتے ہیں
پھر آج کوئے بتاں کا ارادہ رکھتے ہیں
تجھے پکارا ہے بے ارادہ
جو دل دکھا ہے بہت زیادہ
گو سب کو بہم ساغر و بادہ تو نہیں تھا
یہ شہر اداس اتنا زیادہ تو نہیں تھا
واعظ سے رہ و رسم رہی رند سے صحبت
فرق ان میں کوئی اتنا زیادہ تو نہیں تھا

جگر مراد آبادی

تجھ سے خدا ہی سمجھے تو نے کسی کو اے دل
مجھ سے بھی کچھ زیادہ دیوانہ کر دیا ہے

شکیب جلالی

اشکوں سے چراغاں ہے شبِ زیست، سو وہ بھی
کوتاہی مژگاں سے زیادہ نہیں رکھتے

عرفان صدیقی

نوک سناں پہ مصحف ناطق ہے سربلند
اونچے علم تو سب سے زیادہ ہمارے ہیں

ادا جعفری

وہی اشکِ خوں کے گلاب ہیں وہی خار خار ہے پیرہن
نہ کرم کی آس بجھی ابھی نہ ستم کی دھوپ زیادہ ہے
تن زخم زخم کو چھوڑ دے مرے چارہ گر مرے مہرباں
دلِ داغ داغ کا حوصلہ تری مرحمت سے زیادہ ہے

زہرا نگاہ

یہ سچ ہے یہاں شور زیادہ نہیں ہوتا
گھر بار کے بازار میں پر کیا نہیں ہوتا

احمد فراز

جب ملاقات بے ارادہ تھی
اس میں آسودگی زیادہ تھی
زلف کو ہمسری کا دعویٰ تھا
پھر بھی خوش قامتی زیادہ تھی
اپسرا تھی نہ حور تھی نہ پری
دلبری میں مگر زیادہ تھی
یہ غزل دین اس غزال کی ہے
جس میں‌ ہم سے وفا زیادہ تھی
وہ بھی کیا دن تھے جب فراز اس سے
عشق کم عاشقی زیادہ تھی
نہ تیرا قرب نہ بادہ ہے کیا کیا جائے
پھر آج دکھ بھی زیادہ ہے کیا کیا جائے
وہ مہرباں ہے مگر دل کی حرص بھی کم ہو
طلب کرم سے زیادہ ہے کیا کیا جائے
سلوٹیں ہیں مرے چہرے پہ تو حیرت کیوں ہے
زندگی نے مجھے کچھ تم سے زیادہ پہنا
یار خوش ہیں کہ انہیں جامۂ احرام ملا
لوگ ہنستے ہیں کہ قامت سے زیادہ پہنا
کل ہم سے اپنا یار خفا ہو گیا فرازؔ
شاید کہ ہم نے حد سے زیادہ شراب پی
تھا عبث ترکِ تعلق کا ارادہ یوں بھی
عشق زندہ نہیں رہتا ہے زیادہ یوں بھی
کوچ کر جاتے ہیں ہم کوئے محبت سے فرازؔ
ان دنوں چاکِ گریباں ہیں زیادہ یوں بھی

اقبال ساجد

اس سال شرافت کا لبادہ نہیں پہنا
پہنا ہے مگر اتنا زیادہ نہیں پہنا

ناصر کاظمی

اب ان سے اور تقاضائے بادہ کیا کرتا
جو مل گیا ہے میں اس سے زیادہ کیا کرتا