فیض احمد فیض

کسی گماں پہ توقع زیادہ رکھتے ہیں
پھر آج کوئے بتاں کا ارادہ رکھتے ہیں
تجھے پکارا ہے بے ارادہ
جو دل دکھا ہے بہت زیادہ
تھک کر یونہی پل بھر کے لیے آنکھ لگی تھی
سو کر ہی نہ اٹھیں یہ ارادہ تو نہیں تھا

یگانہ چنگیزی

دلِ مضطرب نگاہ گرفتار شش جہت
فرمائیے کدھر کا ارادہ کرے کوئی

جون ایلیا

بہت نزدیک آتی جا رہی ہو
بچھڑنے کا ارادہ کر لیا کیا

شکیب جلالی

اب آپ رہِ دل جو کشادہ نہیں رکھتے
ہم بھی سفرِ جاں کا ارادہ نہیں رکھتے

ادا جعفری

وہی نا صبوری آرزو وہی نقشِ پا وہی جادہ ہے
کوئی سنگ رہ کو خبر کرو اسی آستاں کا ارادہ ہے

شکیل بدایونی

اکثر تو دل گرفتگی شوق کی قسم
مجھ تک وہ آ گئے ہیں ارادہ کیے بغیر

اختر ہوشیارپوری

زیست ہے تیز قدم آگے نکل جائے گی
تم کسی موڑ پہ رکنے کا ارادہ نہ کرو

احمد فراز

جب ملاقات بے ارادہ تھی
اس میں آسودگی زیادہ تھی
نہ اس سے ترکِ تعلق کی بات کر پائیں
نہ ہمدمی کا ارادہ ہے کیا کیا جائے
خواہشیں یوں ہی برہنہ ہوں تو جل بجھتی ہیں
اپنی چاہت کو کبھی کوئی ارادہ پہنا
تھا عبث ترکِ تعلق کا ارادہ یوں بھی
عشق زندہ نہیں رہتا ہے زیادہ یوں بھی

اقبال ساجد

اس نے بھی کئی روز سے خواہش نہیں اوڑھی
میں نے بھی کئی دن سے ارادہ نہیں پہنا

کلیم عاجز

دوستی اس سے نبہ جائے بہت مشکل ہے
میرا تو وعدہ ہے اس کا تو ارادہ بھی نہیں