یگانہ چنگیزی

کارگاہ دنیا کی نیستی بھی ہستی ہے
اک طرف اجڑتی ہے ایک سمت بستی ہے
ہوش اڑیں گے جو زمانے کی ہوا بگڑے گی
چار ہی دن میں خزاں گلشنِ ہستی ہو گا

اسرار الحق مجاز

یہ میری دنیا یہ میری ہستی
نغمہ طرازی صہبا پرستی
شاعر کی دنیا شاعر کی ہستی
یا نالۂ غم یا شور مستی
یا خلد و ساقی اے جذب مستی
یا ٹکڑے ٹکڑے دامان ہستی
ان کا کرم ہے ان کی محبت
کیا میرے نغمے کیا میری ہستی

بہزاد لکھنوی

تو باعث ہستی ہے میں حاصلِ ہستی ہوں
تو خالق الفت ہے اور میں ترا بندہ ہوں

جلیل مانک پوری

مدار زندگی ٹھہرا نفس کی آمد و شد پر
ہوا کے زور سے روشن چراغ بزمِ ہستی ہے
جبھی تک عکس قائم ہے کہ آئینہ مقابل ہو
ہماری یہ حقیقت ہے ہماری اتنی ہستی ہے
بہت جھٹکے نہ دے دستِ جنوں جیب و گریباں کو
رہے تجھ کو لحاظ اس کا پرانا رختِ ہستی ہے
فنا اول بھی تھی آخر بھی ہونا ہے فنا ہم کو
کریں کیا دو عدم کے بیچ میں اک اپنی ہستی ہے

سیف الدین سیف

تیری آنکھوں میں رنگ مستی ہے
ہاں مجھے اعتبار ہستی ہے
میرا ہونا بھی کوئی ہونا ہے
میری ہستی بھی کوئی ہستی ہے
سیفؔ اس زندگی کو کیا کہیے
ایک میت بدوش ہستی ہے

فانی بدایونی

دنیا میری بلا جانے مہنگی ہے یا سستی ہے
موت ملے تو مفت نہ لوں ہستی کی کیا ہستی ہے
خود جو نہ ہونے کا ہو عدم کیا اسے ہونا کہتے ہیں
نیست نہ ہو تو ہست نہیں یہ ہستی کیا ہستی ہے