مرزا غالب

دل ہی تو ہے نہ سنگ و خشت، درد سے بھر نہ آئے کیوں؟
روئیں گے ہم ہزار بار، کوئی ہمیں ستائے کیوں؟
دشنۂِ غمزہ جاں ستاں، ناوکِ ناز بے پناہ
تیرا ہی عکس رخ سہی، سامنے تیرے آئے کیوں؟
میں بلاتا تو ہوں اس کو ، مگر اے جذبۂِ دل
اس پہ بن جائے کچھ ایسی کہ بن آئے نہ بنے

داغ دہلوی

شبِ وصل بھی لب پہ آئے گئے ہیں
یہ نالے بہت منہ لگائے گئے ہیں
مرے دل کی کیونکر نہ ہو پائمالی
بہت اس میں ارمان آئے گئے ہیں

شیخ ابراہیم ذوق

گو جنازے پہ نہیں قبر پہ آئے وہ مری
شکوہ کیا کیجے غنیمت ہے کہ آئے تو سہی
تھے تمہیں نکلے جو اس دام بلا سے اے ذوقؔ
ورنہ تھے پیچ میں اس زلف کے آئے تو سہی

مصحفی غلام ہمدانی

دکان مے فروش پہ گر آئے محتسب
دن عید کے تو خوب گھڑا جائے محتسب
جوں ہی زنجیر کے پاس آئے پاؤں
دیکھ اس کو مرے تھرائے پاؤں
ذرا تو دیکھ تو گھر سے نکل کے اے بے مہر
کہ دیکھنے کو ترے لوگ آئے ہیں کیا کیا

میر مہدی مجروح

یہ جو چپکے سے آئے بیٹھے ہیں
لاکھ فتنے اٹھائے بیٹھے ہیں
مجھ کو محفل میں دیکھ کر بولے
آپ یاں کیوں کہ آئے بیٹھے ہیں
شرم سے ہیں وہ لاکھ پردے میں
گو مرے پاس آئے بیٹھے ہیں
ہو نہ اے شمعِ حسن پر نازاں
وہ بھی محفل میں آئے بیٹھے ہیں
کل تقدس مآب مسجد تھے
آج رندوں میں آئے بیٹھے ہیں