باقی صدیقی

موجِ صبا کے ساتھ چلی گلستان کی بات
بدنام پھول توڑنے والا نہ ہو سکا

جون ایلیا

میں ہر لمحہ اس گھر سے
جانے والا لگتا ہوں
تھیں وہ گھر راتیں بھی کہانی وعدے اور پھر دن گننا
آنا تھا جانے والے کو جانے والا زندہ تھا

جگر مراد آبادی

ہم نے ایسا نہ کوئی دیکھنے والا دیکھا
جو یہ کہہ دے کہ ترا حسن سراپا دیکھا

شکیب جلالی

موتی کیا کیا نہ پڑے ہیں تہِ دریا لیکن
برف لہروں کی کوئی توڑنے والا ہی نہیں

عرفان صدیقی

ایسا گمراہ کیا تھا تری خاموشی نے
سب سمجھتے تھے ترا چاہنے والا مجھ کو
اب میں خود سے بھی مخاطب نہیں ہونے پاتا
جب سے چپ ہو گیا وہ بولنے والا مجھ میں

رئیس فروغؔ

شارٹ سرکٹ سے اڑیں چنگاریاں
صدر میں اک پھول والا جل گیا

اکبر معصوم

ایک ستارہ روشن ہو جو کبھی نہ بجھنے والا ہو
رستہ جانا پہچانا ہو رات بہت انجانی ہو
منظر دیکھنے والا ہو پر کوئی نہ دیکھنے والا ہو
کوئی نہ دیکھنے والا ہو اور دور تلک حیرانی ہو

احمد راہی

آگے کچھ لوگ ہمیں دیکھ کے ہنس دیتے تھے
اب یہ عالم ہے کوئی دیکھنے والا بھی نہیں

جلیل مانک پوری

کیسے خوش رنگ ہیں زخمِ جگر و داغِ جگر
ہم دکھاتے جو کوئی دیکھنے والا ہوتا
تم جو پردے میں سنورتے ہو نتیجہ کیا ہے
لطف جب تھا کہ کوئی دیکھنے والا ہوتا
اس کا جلوہ جو کوئی دیکھنے والا ہوتا
وعدۂ دید قیامت پہ نہ ٹالا ہوتا

ثروت حسین

شہزادی ترے ماتھے پر یہ زخم رہے گا
لیکن اس کو چومنے والا پھر نہیں ہوگا

سلام مچھلی شہری

تھوڑی دیر اے ساقی بزم میں اجالا ہے
جام خالی ہونے تک چاند ڈھلنے والا ہے
میری موت اے ساقی ارتقا ہے ہستی کا
اک سلامؔ جاتا ہے ایک آنے والا ہے

فانی بدایونی

کیا کیا گلے نہ تھے کہ ادھر دیکھتے نہیں
دیکھا تو کوئی دیکھنے والا نہیں رہا

فراق گورکھپوری

کہاں پہ چوک ہوئی تیرے بے قراروں سے
زمانہ دوسری کروٹ بدلنے والا تھا

ناصر کاظمی

آج تو یوں خاموش ہے دنیا
جیسے کچھ ہونے والا ہے

نوح ناروی

وہ کہتے ہیں آؤ مری انجمن میں مگر میں وہاں اب نہیں جانے والا
کہ اکثر بلایا بلا کر بٹھایا بٹھا کر اٹھایا اٹھا کر نکالا
پڑی نیو آپس میں گو دوستی کی مگر دوستی کس طرح نبھ سکے گی
اسے ہے نزاکت مجھے ہے نقاہت نہ وہ آنے والا نہ میں جانے والا
شوالے کی جانب قدم کیوں بڑھاؤں نظر کس لیے سوئے مسجد اٹھاؤں
ادھر کہہ رہا ہے ادھر سن رہا ہے کوئی کہنے والا کوئی سننے والا
وطن سے نکل کر اکیلے چلے تھے مگر خوش یقینی کے قربان جائیں
ملا دشتِ غربت میں اک اک قدم پر ہمیں اک نہ اک جان پہچان والا
فغاں کی بھی امداد حاصل کروں میں محبت کو بھی کچھ توجہ دلاؤں
بھرم جذبِ دل کا نکلنے نہ پائے نکل آئے پردے سے وہ پردے والا
ادھر طور پر غش میں موسیٰ پڑے ہیں ادھر ہاتفِ غیب یہ کہہ رہا ہے
ذرا کھولیے آپ آنکھیں تو اپنی قریب آ گیا دیکھیے دور والا
تمہارا ثنا خواں تمہارا دعا گو تمہارا فدائی تمہارا سلامی
یہ کیا کہہ دیا اس نے واقف نہیں ہم وہی ہاں وہی نوحؔ طوفان والا