باقی صدیقی

لے گیا ساتھ اڑا کر باقیؔ
ایک سوکھا ہوا پتہ ہم کو

عرفان صدیقی

ایسی بے رنگ بھی شاید نہ ہو کل کی دنیا
پھول سے بچوں کے چہروں سے پتہ لگتا ہے

جمال احسانی

جمالؔ اب تو یہی رہ گیا پتہ اس کا
بھلی سی شکل تھی اچھا سا نام تھا اس کا

بہزاد لکھنوی

ہر ایک ذرہ میں میں خود تو آ رہا تھا نظر
عجیب بات تمہارا کہیں پتہ نہ ملا
ترا جمال فضاؤں میں منتشر تھا مگر
نگاہ شوق کو پھر بھی ترا پتہ نہ ملا

بشیر بدر

سب اسی کے ہیں ہوا خوشبو زمین و آسماں
میں جہاں بھی جاؤں گا اس کو پتہ ہو جائے گا

ظہیر کاشمیری

یہ دور تیز گام بھی ہے ان سے بے خبر
وہ منزلیں جو دے گئیں اپنا پتہ ہمیں

ماجد صدیقی

آئینۂ خیال بہ دستِ صبا دیا
ہر گل کو ہم نے یوں بھی تمہارا پتہ دیا

احمد فراز

رہزن ہو تو حاضر ہے متاعِ دل و جاں بھی
رہبر ہو تو منزل کا پتہ کیوں نہیں دیتے

شاذ تمکنت

اک اعتماد وفا ہے کہ جی رہا ہوں میں
کہ میرے حال کا شاید اسے پتہ ہی نہ ہو
اس نے تو شاید بادِ صبا سے نامۂ خوشبو بھیجا تھا
اس کو خبر کیا مجھ کو چمن کا پتہ پتہ بھول گیا

کیف بھوپالی

یوں ڈھونڈتے پھرتے ہیں مرے بعد مجھے وہ
وہ کیفؔ کہیں تیرا پتہ ہے کہ نہیں ہے