باقی صدیقی

قطرے کی آرزو سے گہرا آئنہ بنے
آئنہ ساتھ دے تو نظر آئنہ بنے

شکیب جلالی

کچھ تو آتا مری باتوں کا جواب
یہ کنواں اور جو گہرا ہوتا

مجید امجد

سارے بندھن کڑے سہی، لیکن
تجھ سے یہ ربط، دھندلا اور گہرا

آنس معین

باہر بھی اب اندر جیسا سناٹا ہے
دریا کے اس پار بھی گہرا سناٹا ہے
نئی سحر کی چاپ نہ جانے کب ابھرے گی
چاروں جانب رات کا گہرا سناٹا ہے

اختر ہوشیارپوری

میرے خوں کی گردشیں بھی بڑھ گئیں
اس قبا کا رنگ بھی گہرا ہوا

شاذ تمکنت

پڑتی ہے سات رنگوں پہ تیرے بدن کی چوٹ
جو رنگ تو پہن لے وہ گہرا دکھائی دے

محسن نقوی

یہ مسیحائی اسے بھول گئی ہے محسنؔ
یا پھر ایسا ہے مرا زخم ہی گہرا ہو گا

میرا جی

سوجھ بوجھ کی بات نہیں ہے من موجی ہے مستانہ
لہر لہر سے جا سر پٹکا ساگر گہرا بھول گیا

ناصر کاظمی

آنکھیں اب تک جھانک رہی ہیں
وہ پانی کتنا گہرا تھا
پون ہری، جنگل بھی ہرا تھا
وہ جنگل کتنا گہرا تھا
تنہائی کا دکھ گہرا تھا
میں دریا دریا روتا تھا