باقی صدیقی

نذر دنیا ہوئے ارمان ہمارے کتنے
دیکھتے دیکھتے ٹوٹے ہیں ستارے کتنے

جمال احسانی

دھرتی پر سب درد کے مارے کس کے ہیں
آسمان پر چاند ستارے کس کے ہیں

تلوک چند محروم

کون ہے ضیا افگن چاند میں ستارے میں
آگ کس کی ہے روشن برق کے شرارے میں
ہجراں کی شب جو درد کے مارے اداس ہیں
ان کی نظر میں چاند ستارے اداس ہیں

ثروت حسین

اسم بھول بیٹھے ہم جسم بھول بیٹھے ہم
وہ ہمیں ملی یارو رات اک ستارے میں

حفیظ جالندھری

شبِ تار ہے تابہ صبح قیامت
مقدر ہے گردش ستارے چلا چل
یہ کیا مقام ہے وہ نظارے کہاں گئے
وہ پھول کیا ہوئے وہ ستارے کہاں گئے

سیف الدین سیف

آئے تھے ان کے ساتھ نظارے چلے گئے
وہ شب وہ چاندنی وہ ستارے چلے گئے
جاتے ہی ان کے سیفؔ شبِ غم نے آ لیا
رخصت ہوا وہ چاند ستارے چلے گئے

اکبر حمیدی

ترا آنچل اشارے دے رہا ہے
فلک روشن ستارے دے رہا ہے

احمد فراز

وہ جو آ جاتے تھے آنکھوں میں‌ ستارے لے کر
جانے کس دیس گئے خواب ہمارے لے کر
ہونٹ ہیروں سے نہ چہرہ ہے ستارے کی مثال
‮پھر بھی لادے تو کوئی دوست ہمارے کی مثال
زندگی اوڑھ کے بیٹھی تھی ردائے شبِ غم
تیرا غم ٹانک دیا ہم نے ستارے کی مثال
ہم کبھی ٹوٹ کے روئے نہ کبھی کھل کے ہنسے
رات شبنم کی طرح صبح ستارے کی مثال
دل کہتا ہے کھل کر سچی بات کہو
اور لفظوں کے بیچ ستارے مت لکھو

کلیم عاجز

ہم تو مٹی سے اگائیں گے محبت کے گلاب
تم اگر توڑنے جاتے ہو ستارے جاؤ