باقی صدیقی

دل کی کشتی کا اعتبار نہیں
تیری آواز پر یہ چلتی ہے

عرفان صدیقی

میں اپنے وقت سے آگے نکل گیا ہوتا
مگر زمیں بھی مرے ساتھ ساتھ چلتی رہی
گرتی ہی چلی جائے سنبھلتی ہی چلی جائے
کیا تیغ ہے ، چل جائے تو چلتی ہی چلی جائے

رئیس فروغؔ

وہ تو ساون کی ہواؤں میں پھسلتی جائے
چھاؤں آنچل سے الجھتی ہوئی چلتی جائے

عزیز حامد مدنی

جی دارو! دوزخ کی ہوا میں کس کی محبت جلتی ہے
تیز دہکتی آگ زمیں پر خندق خندق چلتی ہے
آسیبی سی شمعیں لے کر سیاروں میں گھوم گئی
کوئی ہوا ایسی ہے کہ دنیا نیند میں اٹھ کر چلتی ہے
کہساروں کی برف پگھل کر دریاؤں میں جا نکلی
کچھ تو پاس آبِ رواں کر نبض جنوں کیا چلتی ہے
قندیل راہب کا جادو آسیبی تاروں کے موڑ
کاٹ کے وقت کی اک پرچھائیں خواب نما سی چلتی ہے
روایت کی قناتیں جس ہوا سے جلنے والی ہیں
سواد ایشیا میں وہ ہوا اب تیز چلتی ہے

محبوب خزاں

سنبھالنے سے طبیعت کہاں سنبھلتی ہے
وہ بے کسی ہے کہ دنیا رگوں میں چلتی ہے
تمہیں خیال نہیں کس طرح بتائیں تمہیں
کہ سانس چلتی ہے لیکن اداس چلتی ہے