باقی صدیقی

حیات راس نہ آئی اگرچہ دل میں مرے
بدل بدل کے امیدوں کا وہ لباس آئے

شکیب جلالی

سوچو تو سلوٹوں سے بھری ہے تمام روح
دیکھو تو اک شکن بھی نہیں ہے لباس میں
اتر گیا تنِ نازک سے پتیوں کا لباس
کسی کے ہاتھ نہ آئی مگر گلاب کی باس

عرفان صدیقی

دلوں میں اب وہ پرانی کدورتیں بھی نہیں
یہ سایہ دار شجرِ بے لباس کیسے ہوئے

ظہیر کاشمیری

کس کا دامن رہا ہے بے پیوند
کون آسودۂ لباس رہا

غلام محمد قاصر

گلچیں کے چہرے کی رنگت روز بدلتی رہتی تھی
رنج و خوشی کے ہر موسم میں پھول کا ایک لباس رہا

رسا چغتائی

رات آئی ادھر ستاروں نے
شبنمی پیرہن لباس کیا
بال تو دھوپ میں سفید کیے
زرد کس چھاؤں میں لباس کیا

احمد فراز

فراز تیرے گریباں پہ کل جو ہنستا تھا
اسے ملے تو دریدہ لباس تھا وہ بھی

محسن نقوی

اکثر مری قبا پہ ہنسی آ گئی جسے
کل مل گیا تو وہ بھی دریدہ لباس تھا
فضا کا حبس شگوفوں کو باس کیا دے گا
بدن دریدہ کسی کو لباس کیا دے گا

ناصر کاظمی

چھاؤں مل جائے دامنِ گل کی
ہے غریبی میں یہ لباس بہت