جگر مراد آبادی

سوزِ غم دیکھ نہ برباد ہو حاصل میرا
دل کی تصویر ہے ہر آئینۂ دل میرا

عرفان صدیقی

اپنا ہی چہرہ انہیں مجھ میں دکھائی دے گا
لوگ تصویر سمجھتے ہیں میں آئینہ ہوں
مجھے اوروں کے سے انداز آتے آتے آئیں گے
کہ پتھر بن سکے گا آئینہ آہستہ آہستہ
رنگ روشن تھا سوادِ جاں میں اک تصویر کا
ایک چہرہ میری آنکھیں آئینہ کرتا تھا رات

سدرشن فاکر

اپنی صورت لگی پرائی سی
جب کبھی ہم نے آئینہ دیکھا

عالم تاب تشنہ

یہ کہنا تم سے بچھڑ کر بکھر گیا تشنہؔ
کہ جیسے ہاتھ سے گر جائے آئینہ کہنا

عبید اللہ علیم

چہرہ مجھے اپنا دیکھنے کو
اب دستِ ہوس میں آئینہ دے

ثروت حسین

اچھا سا کوئی سپنا دیکھو اور مجھے دیکھو
جاگو تو آئینہ دیکھو اور مجھے دیکھو
یہ میرے ہونٹ سمندر کو چوم سکتے ہیں
حکایت شب افراد و آئینہ سے ادھر

سیماب اکبر آبادی

جلوہ گر ہے اس میں اے سیمابؔ اک دنیائے حسن
جامِ جم سے ہے زیادہ دل کا آئینہ مجھے

شاد عظیم آبادی

تصور اس رخ صافی کا رکھ مدِ نظر ناداں
لگائے منہ جو آئینے کو آئینہ اسی کا ہے
کدورت سے دل اپنا صاف رکھو شادؔ پیری ہے
کہ جس کو منہ دکھانا ہے یہ آئینہ اسی کا ہے

احمد فراز

اس ایک شخص کی سج دھج غضب کی تھی کہ فراز
میں دیکھتا تھا، اسے دیکھتا تھا آئینہ

ناصر کاظمی

پیلے پتھریلے ہاتھوں میں
نیلی جھیل کا آئینہ تھا
مجھ سے آنکھ ملائے کون
میں تیرا آئینہ ہوں