جگر مراد آبادی

ہمیں پہ عشق کی تہمت لگائی جاتی ہے
مگر یہ شرم جو چہرے پہ چھائی جاتی ہے
ترے حضور یہ کیا وارداتِ قلب ہے آج
کہ جیسے چاند پہ بدلی سی چھائی جاتی ہے

قمر جلالوی

قمر ان کو تو مستحکم ہے وعدہ شب کو آنے کا
نہ جانے کیوں اداسی شام سے تاروں پہ چھائی ہے

الطاف حسین حالی

وصل کے ہو ہو کے ساماں رہ گئے
مینہ نہ برسا اور گھٹا چھائی بہت

رئیس فروغؔ

میرے اوپر جالا بننے
پھر کوئی بدلی چھائی ہے

بشیر بدر

وہ لب ہیں کہ دو مصرعے اور دونوں برابر کے
زلفیں کہ دل شاعر پر چھائی ہوئی غزلیں

حفیظ جالندھری

موت کے چہرے پہ ہے کیوں مردنی چھائی ہوئی
دیکھنا کون آ گیا کیوں ٹل گئی آئی ہوئی
کوئی بدلی تو نہیں ابھری افق پر دیکھنا
پھر فضائے توبہ پر ہے بے دلی چھائی ہوئی
کاش اس مصرع کا تم کو پاس ہوتا اے حفیظؔ
یہ بہار آئی ہوئی ایسی گھٹا چھائی ہوئی

سیف الدین سیف

ایک اداسی دل پر چھائی رہتی ہے
میرے کمرے میں تنہائی رہتی ہے

قتیل شفائی

قتیلؔ اس دم بھی رہتا ہے یہی احساس محرومی
جب ان شانوں پہ زلفوں کی گھٹا چھائی بھی ہوتی ہے

کلیم عاجز

بدلی سی اپنی آنکھوں میں چھائی ہوئی سی ہے
بھولی ہوئی سی یاد پھر آئی ہوئی سی ہے

میرا جی

ایسے ڈولے من کا بجرا جیسے نین بیچ ہو کجرا
دل کے اندر دھوم مچی ہے جگ میں اداسی چھائی ہے