سراج الدین ظفر

عشق میں کیا ہاتھوں سے کسی کے دامن ہستی چھوٹ گیا
شمع کوئی خاموش ہوئی یا کوئی ستارا ٹوٹ گیا
تیری بھی تصویر تھی اس میں اس کا مجھ کو رونا ہے
ورنہ دل کی ہستی کیا ہے شیشہ تھا سو ٹوٹ گیا
آہ محبت کا رشتہ تھا نازک سے بھی نازک تر
اب اس کو کس طرح سے جوڑیں ٹوٹ گیا سو ٹوٹ گیا
اول اول ذوق محبت تھا مستی بے پایاں
آخر آخر وقت وہ آیا سحرِ محبت ٹوٹ گیا

شاد عظیم آبادی

نالوں کی کشاکش سہہ نہ سکا خود تارِ نفس بھی ٹوٹ گیا
اک عمر سے تھی تکلیف جسے کل شب کو وہ قیدی چھوٹ گیا
نازک تھا بہت کچھ دل میرا اے شادؔ تحمل ہو نہ سکا
اک ٹھیس لگی تھی یوں ہی سی کیا جلد یہ شیشہ ٹوٹ گیا