عبدالحمید عدم

اگرچہ روزِ ازل بھی یہی اندھیرا تھا
تری جبیں سے نکلتا ہوا سویرا تھا

قمر جلالوی

کاٹنی ہی کیا شبِ ہستی سرائے دہر میں
اک ذرا سی آنکھ جھپکائی سویرا ہو گیا

عرفان صدیقی

یہ تو اک بھولا ہوا چہرہ ہے ، جب یاد آ جائے
شام دیکھے نہ یہ مہتاب سویرا دیکھے

زہرا نگاہ

رات گہری تھی پھر بھی سویرا سا تھا
ایک چہرہ کہ آنکھوں میں ٹھہرا سا تھا

ثروت حسین

زرد گلاب اور آئینوں کو چاہنے والی
ایسی دھوپ اور ایسا سویرا پھر نہیں ہوگا

حسرت موہانی

گھر سے ہر وقت نکل آتے ہو کھولے ہوئے بال
شام دیکھو نہ مری جان سویرا دیکھو

حفیظ جالندھری

اب تو کچھ اور بھی اندھیرا ہے
یہ مری رات کا سویرا ہے

سلام مچھلی شہری

رات دل کو تھا سحر کا انتظار
اب یہ غم ہے کیوں سویرا ہو گیا

شاذ تمکنت

لہجے کے لوچ میں ہے گناہوں کی دل کشی
آنکھوں میں معبدوں کا سویرا دکھائی دے

قتیل شفائی

مرے تصور کے راستوں میں ابھر کے ڈوبی ہزار آہٹ
نہ جانے شامِ الم سے مل کر کہاں سویرا پلٹ گیا ہے