قمر جلالوی

عمر بھر خاک ہی کیا چھانتے ویرانوں کی
بات تھی آئی گئی ہو گئی دیوانوں کی
جا چکے چھوڑ کر آزادیاں ویرانوں کی
اب تو بستی میں خبر جائے گی دیوانوں کی

ضیا جالندھری

اس آرائش سے تو کچھ اور ابھری ان کی ویرانی
ببولوں پر بہار آئی تو ویرانوں کے دل ٹوٹے

علی سردار جعفری

خرد والو جنوں والوں کے ویرانوں میں آ جاؤ
دلوں کے باغ زخموں کے گلستانوں میں آ جاؤ

سیف الدین سیف

دل نے چھوڑا نہ امیدوں کا خیال
پھول کھلتے رہے ویرانوں میں

فراق گورکھپوری

بستیاں ڈھونڈ رہی ہیں انہیں ویرانوں میں
وحشتیں بڑھ گئیں حد سے ترے دیوانوں میں
سیر کر اجڑے دلوں کی جو طبیعت ہے اداس
جی بہل جاتے ہیں اکثر انہیں ویرانوں میں
جان ایمان جنوں سلسلہ جنبان جنوں
کچھ کشش ہائے نہاں جذب ہیں ویرانوں میں
دیکھ جب عالمِ ہو کو تو نیا عالم ہے
بستیاں بھی نظر آنے لگیں ویرانوں میں