قمر جلالوی

عمر بھر خاک ہی کیا چھانتے ویرانوں کی
بات تھی آئی گئی ہو گئی دیوانوں کی
جا چکے چھوڑ کر آزادیاں ویرانوں کی
اب تو بستی میں خبر جائے گی دیوانوں کی
کون کہہ دے گا کہ باتیں ہیں دیوانوں کی
دھجیاں جیب میں رکھی ہیں گریبانوں کی
یادگاریں نہیں کچھ اور تو دیوانوں کی
دھجیاں ملتی ہیں صحرا میں گریبانوں کی
خیر محفل میں نہیں حسن کے دیوانوں کی
شمع کے بھیس میں موت آئی ہے پروانوں کی

احسان دانش

پھر گھٹاؤں میں ہے نقارۂ وحشت کی صدا
ٹولیاں بندھ کے چلیں دشت کو دیوانوں کی
آج بھڑکی رگ وحشت ترے دیوانوں کی
قسمتیں جاگنے والی ہیں بیابانوں کی

ضیا جالندھری

کہاں کا صبر سو سو بار دیوانوں کے دل ٹوٹے
شکستِ دل کے خدشے ہی سے نادانوں کے دل ٹوٹے

ظہیر کاشمیری

عارض شمع پہ نیند آ گئی پروانوں کو
خواب سے اب نہ جگائے کوئی دیوانوں کو

علی سردار جعفری

یہ دامان و گریباں اب سلامت رہ نہیں سکتے
ابھی تک کچھ نہیں بگڑا ہے دیوانوں میں آ جاؤ

حسرت موہانی

خو سمجھ میں نہیں آتی ترے دیوانوں کی
دامنوں کی نہ خبر ہے نہ گریبانوں کی

سیف الدین سیف

اب وہ سودا نہیں دیوانوں میں
خاک اڑتی ہے بیابانوں میں

امیر مینائی

قدر داں چاہیے دیوان ہمارا ہے امیر
منتخب مصحفی و میر کے دیوانوں کا

فراق گورکھپوری

بستیاں ڈھونڈ رہی ہیں انہیں ویرانوں میں
وحشتیں بڑھ گئیں حد سے ترے دیوانوں میں
اب وہ رنگِ چمن و خندۂ گل بھی نہ رہے
اب وہ آثار جنوں بھی نہیں دیوانوں میں