شکیب جلالی

سایہ کیوں جل کے ہوا خاک تجھے کیا معلوم
تو کبھی آگ کے دریاؤں میں اترا ہی نہیں
مجھ سے شفاف ہے سینہ کس کا
چاند اس جھیل میں اترا ہوتا

احسان دانش

دل کچھ ثبوت حفظ شریعت نہ دے سکا
ساقی کے لطفِ خاص پہ اترا کے پی گیا

بشیر بدر

شبنم کے آنسو پھول پر یہ تو وہی قصہ ہوا
آنکھیں مری بھیگی ہوئی چہرہ ترا اترا ہوا

جلیل مانک پوری

دو روزہ حسن پر پھولے ہیں کیا گل
بڑے کم ظرف ہیں اترا رہے ہیں

اختر ہوشیارپوری

دوپہر گزری مگر دھوپ کا عالم ہے وہی
کوئی سایہ کسی دیوار سے اترا ہوتا

محسن احسان

بہار دشت آرائی کا موسم
زمینوں پر ابھی اترا کہاں ہے

ناصر کاظمی

شام سے سوچ رہا ہوں ناصر
چاند کس شہر میں اترا ہو گا
نیل گگن سے ایک پرندہ
پیلی دھرتی پر اترا تھا
یادوں کی سیڑھی سے ناصر
رات اک سایا سا اترا تھا
پیاسی کونجوں کے جنگل میں
میں پانی پینے اترا تھا
چھوٹی رات سفر لمبا تھا
میں اک بستی میں اترا تھا
شہر کے خالی اسٹیشن پر
کوئی مسافر اترا ہو گا